اداکار شان کی بطور ڈائریکٹر فلم ’سائیکو‘ کے ٹیزر کی لانچنگ تقریب

پاکستان فلم انڈسٹری کے نامور اداکار و ہدایت کار شان شاہد کی نئی فلم ’سائیکو‘ کے ٹیزر کی لانچنگ تقریب لاہور کے مقامی ہوٹل میں منعقد ہوئی، جس میں فلمی دنیا کے ستاروں اور اہم شخصیات نے بڑی تعداد میں شرکت کر کے رونق بخشی۔

تقریب میں فلم کے کو-پروڈیوسر خواجہ راحت حسین، شان شاہد، اداکارہ میرا اور پروڈیوسر صفدر ملک کے ساتھ ساتھ انڈسٹری کے معتبر ناموں نے شرکت کی۔ مہمانوں میں معروف رائٹر خلیل الرحمان قمر، چیئرمین ڈائریکٹر ایسوسی ایشن مسعود بٹ، شہزاد رفیق، اداکار نیر اعجاز، عابد شیخ، عدنان بٹ اور کوریوگرافر پپو سمراٹ سمیت کئی فنکار شامل تھے۔

اس موقع پر شان شاہد نے میڈیا سے گفتگو کرتے ہوئے بتایا کہ فلم ’سائیکو‘ ایک منفرد کہانی اور جدید فلم سازی کا شاہکار ہے جو عید الاضحیٰ پر سینما گھروں کی زینت بنے گی۔ تقریب کے دوران جب فلم کا ٹیزر دکھایا گیا تو شرکاء نے شان شاہد کی ہدایت کاری اور فلم کے معیار کو بے حد سراہا اور اسے پاکستانی سینما کے لیے ایک خوش آئند قدم قرار دیا۔