سوشل میڈیا سے 6 لاکھ روپے آمدن پر کوئی ٹیکس نہیں ہوگا، چیئرمین ایف بی آر

سوشل میڈیا پلیٹ فارمز کے ذریعے ہونے والی کمائی پر ٹیکس عائد کرنے کی تجویز سینیٹ کی قائمہ کمیٹی برائے خزانہ کے اجلاس میں زیرِ بحث آئی، جس کے دوران چیئرمین ایف بی آر راشد محمود لنگڑیال اور کمیٹی ارکان کے درمیان دلچسپ نوک جھونک دیکھنے کو ملی۔ چیئرمین ایف بی آر نے واضح کیا کہ سوشل میڈیا سے سالانہ 6 لاکھ روپے تک کمانے والوں پر کوئی ٹیکس لاگو نہیں ہوگا، تاہم 6 لاکھ سے 12 لاکھ روپے تک کی آمدن پر 5 فیصد ودہولڈنگ ٹیکس عائد کیا جائے گا۔ راشد محمود لنگڑیال کا کہنا تھا کہ سوشل میڈیا سے اس وقت بہت سے لوگ بھاری رقوم کما رہے ہیں اور ہم تو صرف اس کمائی میں سے حکومت کا جائز حصہ مانگ رہے ہیں۔ قائمہ کمیٹی نے تفصیلی غور و خوض کے بعد سوشل میڈیا کی آمدن پر اس 5 فیصد ودہولڈنگ ٹیکس کی تجویز کو باقاعدہ منظور کر لیا ہے۔

دوسری جانب، سینیٹ کمیٹی کے ارکان نے آئی ٹی اور سوشل میڈیا سیکٹر پر ٹیکس لگانے کی سخت مخالفت کی اور فری لانسرز و کنٹنٹ کریٹرز کی حمایت میں آواز اٹھائی۔ چیئرمین کمیٹی سلیم مانڈوی والا نے چیئرمین ایف بی آر کو ٹوکتے ہوئے کہا کہ آپ ٹیکس اس لیے لینا چاہتے ہیں کیونکہ آپ کو وہاں ایک بڑی رقم آتی ہوئی نظر آ رہی ہے، لہٰذا لوگوں کو سکون سے کمانے دیں اور ان پر بوجھ نہ ڈالیں۔ کمیٹی کے رکن سینیٹر عبدالقادر نے بھی اس مؤقف کی بھرپور تائید کرتے ہوئے کہا کہ جو نوجوان اپنی محنت سے کچھ کر رہے ہیں اور ملک میں قیمتی ڈالرز لا رہے ہیں، انہیں چلنے دیا جائے اور ان کی حوصلہ شکنی نہ کی جائے، کیونکہ ڈالرز کی آمد ملکی معیشت کے لیے خود ایک مثبت اشارہ ہے۔