جنوبی لبنان میں اسرائیلی ڈرون حملے، مزید 2 افراد جاں بحق ہوگئے

ایران پر امریکی حملوں کے بعد پیدا ہونے والی شدید علاقائی کشیدگی کے دوران، اسرائیل نے جنوبی لبنان میں نئے فضائی حملے کر دیے ہیں جس کے نتیجے میں مزید 2 افراد جاں بحق ہو گئے۔ لبنان کی نیشنل نیوز ایجنسی کی رپورٹ کے مطابق، یہ کارروائی اسرائیلی فورسز نے جنوبی لبنان کے علاقے نبطیہ الفوقہ میں ایک ڈرون حملے کے ذریعے کی، جہاں غندور اسپتال کے قریب پیدل جانے والے دو افراد کو نشانہ بنایا گیا۔

ڈرون سے داغے جانے والے میزائل کے نتیجے میں دونوں افراد موقع پر ہی دم توڑ گئے، جبکہ واقعے کے فوری بعد امدادی ٹیمیں جائے وقوعہ پر پہنچ گئیں۔ لبنان کی وزارتِ صحت کی جانب سے جاری کردہ تازہ ترین اعداد و شمار کے مطابق، 2 مارچ سے 8 جولائی کے دوران لبنانی علاقوں پر ہونے والے اسرائیلی حملوں میں اب تک مجموعی طور پر 4,321 افراد جاں بحق جبکہ 12,203 افراد زخمی ہو چکے ہیں۔