اٹلی کا ایران کیخلاف کسی بھی فوجی کارروائی میں شریک نہ ہونے کا اعلان

اٹلی کی وزیراعظم جارجیا میلونی نے ایک بار پھر واضح الفاظ میں اعلان کیا ہے کہ اٹلی ایران کے خلاف کسی بھی قسم کی عسکری یا فوجی کارروائی میں شریک نہیں ہوگا اور اس حوالے سے روم کے اصولی مؤقف میں کوئی تبدیلی نہیں آئی ہے۔ نیٹو (NATO) سربراہی اجلاس کے موقع پر بین الاقوامی صحافیوں سے خصوصی گفتگو کرتے ہوئے جارجیا میلونی نے کہا کہ امریکہ اور ایران کے درمیان تنازع کے آغاز سے ہی اٹلی کا مؤقف بالکل واضح اور دوٹوک رہا ہے کہ ہم ایران کے خلاف کیے جانے والے کسی بھی حملے کا حصہ نہیں بنیں گے۔ انہوں نے مزید یاددہانی کروائی کہ مشرقِ وسطیٰ میں بڑھتی ہوئی شدید ترین کشیدگی اور بدلتے ہوئے حالات کے باوجود اٹلی اپنی غیر جانبدارانہ اور پرامن پالیسی پر سختی سے قائم ہے اور تہران کے خلاف کسی بھی عسکری اتحاد یا کارروائی میں شامل ہونے کا کوئی ارادہ نہیں رکھتا۔