مزارِ قائد مینجمنٹ بورڈ: پنجاب اور بلوچستان نے سالوں سے فنڈز نہیں دیے، پانی کے 162 ملین کے واجبات کا انکشاف

سینیٹر وقار مہدی کی زیرِ صدارت سینیٹ کی ذیلی کمیٹی کے اجلاس میں یہ سنسنی خیز انکشاف سامنے آیا ہے کہ پنجاب اور بلوچستان کی حکومتوں نے قواعد و ضوابط کی خلاف ورزی کرتے ہوئے کئی سالوں سے مزارِ قائد اعظم مینجمنٹ بورڈ کو کوئی فنڈز جاری نہیں کیے۔ اجلاس میں پیش کردہ تفصیلات کے مطابق، پنجاب حکومت نے مالی سال 2018-19 سے اب تک مزارِ قائد کو ایک روپیہ بھی نہیں دیا، جبکہ خیبر پختونخوا حکومت نے 2019-20 میں محض 50 لاکھ روپے دیے، اس کے برعکس سندھ حکومت نے 2018 سے 2026 تک 120 ملین روپے کے فنڈز فراہم کیے۔ ریزیڈنٹ انجینئر نے کمیٹی کو بتایا کہ مزارِ قائد کو شدید قلتِ آب کا سامنا ہے، جہاں روزانہ 3 لاکھ گیلن کی ضرورت کے مقابلے میں صرف 1 لاکھ گیلن پانی مل رہا ہے اور کراچی واٹر کارپوریشن کے 162 ملین روپے کے واجبات بھی بقایا ہیں۔ اجلاس میں مزارِ قائد کے متصل گراؤنڈ کی گرلز نشئیوں کی جانب سے اتارے جانے اور سیکیورٹی خدشات کے نام پر مزار کو عوام کے لیے بند رکھنے پر سینیٹر بشریٰ انجم بٹ اور مسرور احسن نے شدید تشویش کا اظہار کیا۔ کمیٹی نے مزارِ قائد کے پانی اور بجلی کے بل معاف کرنے اور پارکنگ فیس کی چھوٹ دینے کی سفارشات بھی پیش کیں۔