آئی ایس پی آر سمر انٹرن شپ 2026 کے طلبہ کا قلعہ بالاحصار پشاور کا دورہ

پشاور: پاک فوج کے شعبہ تعلقات عامہ کے زیرِ اہتمام جاری ISPR Summer Internship 2026 کے سلسلے میں خیبرپختونخوا کی مختلف جامعات سے تعلق رکھنے والے طلبہ و طالبات کے وفد نے پشاور کے تاریخی قلعہ بالاحصار کا مطالعاتی و علمی دورہ کیا۔ دورے کے آغاز پر طلبہ نے یادگارِ شہداء پر پھولوں کی چادر چڑھائی اور ملک و ملت کی خاطر جانوں کا نذرانہ پیش کرنے والے شہدائے پاکستان کو خراجِ عقیدت پیش کیا۔ بعد ازاں وفد کو فرنٹیئر کور (ایف سی) خیبرپختونخوا نارتھ اور قلعہ بالاحصار کے تاریخی، دفاعی اور ثقافتی پس منظر سے متعلق تفصیلی بریفنگ دی گئی۔ طلبہ نے بالاحصار میوزیم کا بھی دورہ کیا اور خطے کے تاریخی و ثقافتی ورثے کو قریب سے دیکھا۔ اس موقع پر طلبہ کی انسپکٹر جنرل فرنٹیئر کور (آئی جی ایف سی) خیبرپختونخوا نارتھ سے خصوصی نشست کا اہتمام کیا گیا۔ آئی جی ایف سی نے خطے میں امن و امان کی بحالی، سرحدی سیکیورٹی اور پاک افغان بارڈر کی صورتحال کے حوالے سے درپیش چیلنجز پر روشنی ڈالی اور طلبہ کے سوالات کے تفصیلی جوابات دیے۔ دورے میں شریک طلبہ نے اس اقدام کو بیحد معلوماتی اور مفید قرار دیتے ہوئے کہا کہ بریفنگ کے ذریعے انہیں سیکیورٹی فورسز کے کردار کو سمجھنے میں مدد ملی۔ انہوں نے ملک میں امن کے قیام کے لیے ایف سی خیبرپختونخوا کے جوانوں اور افسران کی بے مثال قربانیوں کو بھرپور انداز میں سراہا۔