پاکستان اور شام کا دفاعی شعبوں میں تعاون اور روابط بڑھانے پر اتفاق

شام کے وزیر خارجہ اسعد حسن الشیبانی نے ایک اعلیٰ سطحی وفد کے ہمراہ جی ایچ کیو راولپنڈی میں آرمی چیف جنرل سید عاصم منیر سے ملاقات کی۔ پاک فوج کے شعبہ تعلقات عامہ (آئی ایس پی آر) کے مطابق ملاقات کے دوران باہمی دلچسپی کے امور، خطے کی سیکیورٹی صورتحال اور دونوں ممالک کے درمیان دفاعی و سیکیورٹی تعاون بڑھانے پر تفصیلی گفتگو کی گئی۔ آرمی چیف نے پاکستان اور شام کے دیرینہ برادرانہ تعلقات کو اجاگر کرتے ہوئے علاقائی امن اور مشترکہ سیکیورٹی چیلنجز سے نمٹنے کے لیے تعاون پر زور دیا۔ شامی وزیر خارجہ نے علاقائی استحکام کے لیے پاک فوج کے پیشہ ورانہ کردار کو سراہا، جبکہ دونوں رہنماؤں نے دوطرفہ روابط اور دفاعی شعبے میں شراکت داری کو مزید مضبوط بنانے کے عزم کا اعادہ کیا۔