سیلینا گومز پر سرمایہ کاروں کا فراڈ کا الزام، ذہنی صحت کے اسٹارٹ اپ پر مقدمہ

معروف امریکی گلوکارہ اور اداکارہ سیلینا گومز کو اپنے ذہنی صحت سے متعلق اسٹارٹ اپ ‘ونڈر مائنڈ’ (Wondermind) سے متعلق قانونی چیلنج اور مقدمے کا سامنا کرنا پڑ گیا ہے۔ بین الاقوامی خبر رساں اداروں کے مطابق کمپنی کے سرمایہ کاروں نے ان کے خلاف عدالت سے رجوع کرتے ہوئے الزام عائد کیا ہے کہ سیلینا گومز نے کمپنی کی تعمیر اور تشہیر سے متعلق اپنی طے شدہ ذمہ داریاں اور وعدے پورے نہیں کیے۔

رپورٹس کے مطابق پانچ مختلف سرمایہ کاروں نے 2022ء میں ‘ونڈر مائنڈ گلوبل’ میں مجموعی طور پر تقریباً 12 لاکھ ڈالر (1.2 ملین ڈالر) کی سرمایہ کاری کی تھی۔ اس کمپنی کا آغاز 2021ء میں کیا گیا تھا، جس کا بنیادی مقصد عام صارفین اور بالخصوص نوجوانوں کی ذہنی صحت کی بہتری کے لیے مختلف وسائل اور مواد فراہم کرنا تھا۔ سرمایہ کاروں کے مطابق سیلینا گومز کی جانب سے عدم توجہی کے باعث کمپنی اپنے طے شدہ اہداف حاصل کرنے میں ناکام رہی۔