بھارت جاکر شادی کرنے والی سیما حیدر کے یہاں 11 ماہ میں دوسرے بچے کی پیدائش

پاکستان سے غیر قانونی طور پر بھارت جانے والی سیما حیدر ایک بار پھر خبروں کی زینت بن گئی ہیں۔ بھارتی میڈیا رپورٹس کے مطابق، سیما حیدر اور ان کے بھارتی شوہر سچن مینا کے ہاں گزشتہ 11 ماہ کے دوران دوسرے بچے کی پیدائش ہوئی ہے۔

واضح رہے کہ اس سے قبل 15 مارچ 2025 کو سیما نے ایک بیٹی کو جنم دیا تھا۔ سیما حیدر کے پہلے شوہر (غلام حیدر) سے چار بچے ہیں جو اس وقت بھارت میں ہی ان کے ساتھ مقیم ہیں۔ سیما حیدر 2023 میں نیپال کے راستے غیر قانونی طور پر بھارت داخل ہوئی تھیں، جہاں انہوں نے آن لائن گیم کے ذریعے دوستی کرنے والے اپنے محبوب سچن سے شادی کر لی تھی۔

30 سالہ سیما اور ان سے 10 سال چھوٹے سچن کی ملاقات 2019 میں پب جی (PUBG) گیم کے ذریعے ہوئی تھی، جو وقت کے ساتھ محبت میں بدل گئی۔ اگرچہ ان کی بھارت آمد پر سیکیورٹی اداروں نے سخت تحقیقات کیں، تاہم بعد ازاں انہیں بھارت میں رہنے کی اجازت مل گئی۔ سیما اب مکمل طور پر بھارتی رنگ ڈھنگ اپنا چکی ہیں اور اکثر سوشل میڈیا پر اپنی ویڈیوز کے ذریعے اپنی نئی زندگی کی جھلکیاں شیئر کرتی رہتی ہیں۔