مستونگ میں بارود سے بھری گاڑی کا حملہ ناکام، 3 دہشتگرد ہلاک، 2 شہری شہید

بلوچستان کے ضلع مستونگ میں قومی شاہراہ این-25 پر واقع کنڈاوا پوسٹ پر دہشتگردوں نے بارود سے بھری گاڑی کے ذریعے حملے کی کوشش کی، تاہم سکیورٹی فورسز نے انتہائی مستعدی اور بروقت کارروائی کرتے ہوئے دہشتگردی کا یہ بڑا منصوبہ ناکام بنا دیا۔

سکیورٹی فورسز کی بھرپور جوابی کارروائی کے نتیجے میں 3 دہشتگرد موقع پر ہی ہلاک ہو گئے، جبکہ بارود سے بھری گاڑی کے دھماکے کے باعث 2 معصوم شہری شہید اور ایف سی اہلکاروں سمیت متعدد افراد زخمی ہو گئے۔ ابتدائی تفصیلات کے مطابق ‘فتنہ الہندوستان’ سے تعلق رکھنے والے دہشتگردوں نے بارود سے بھری گاڑی کے ذریعے سکیورٹی پوسٹ کو نشانہ بنانے کی مذموم کوشش کی، جس کے دھماکے کی شدت سے قریبی رہائشی مکانات اور ایک مسجد کو بھی نقصان پہنچا۔

حکام کے مطابق اس افسوسناک واقعے میں شہید ہونے والے شہریوں کی شناخت کلیم اللہ ولد عبداللہ اور بی بی لائبہ دختر دل مراد کے نام سے ہوئی ہے، جبکہ دھماکے میں 3 ایف سی اہلکاروں سمیت درجنوں شہری زخمی ہوئے۔ زخمی ہونے والے شہریوں میں 63 سالہ عبدالحق، 21 سالہ محمد اکرام، 35 سالہ محمد رمضان، 3 سالہ کمسن محمد سنان، 21 سالہ تانیہ، 23 سالہ منزہ، 25 سالہ بی بی حسینہ، 45 سالہ زاہدہ، 18 سالہ فائزہ گل، 35 سالہ شاہینہ، 12 سالہ شہلیزہ، 22 سالہ معراج اور 36 سالہ بی بی سیدہ شامل ہیں، جنہیں فوری طبی امداد کی فراہمی کے لیے متعلقہ قریبی طبی مراکز اور ہسپتالوں میں منتقل کر دیا گیا ہے۔

سکیورٹی فورسز کے مطابق بروقت جوابی کارروائی کے دوران دہشتگردوں کی بڑی تباہی پھیلانے کے عزائم کو خاک میں ملا دیا گیا۔ فورسز کے مؤقف میں کہا گیا ہے کہ بے گناہ شہریوں، بچوں، خواتین اور مسجد کو نقصان پہنچانے والے اس بزدلانہ حملے سے واضح ہوتا ہے کہ دہشتگردوں کا بلوچستان کے غیور عوام سے کوئی تعلق نہیں ہے۔ سکیورٹی فورسز نے اس عزم کا اعادہ کیا ہے کہ بلوچستان میں امن، ترقی اور خوشحالی کے دشمنوں کے خلاف بلاامتیاز کارروائیاں جاری رہیں گی اور عوام کے جان و مال کا تحفظ ہر صورت یقینی بنایا جائے گا۔