آزاد کشمیر میں قیمتی معدنی اور یاقوت کے بڑے ذخائر موجود ہیں: سید افتخار گیلانی

وزیراعظم آزاد کشمیر سید افتخار گیلانی نے کہا ہے کہ آزاد کشمیر میں قیمتی معدنیات اور قیمتی پتھروں کے وسیع ذخائر موجود ہیں، جن سے فائدہ اٹھانے کے لیے خطے میں معدنیات سے متعلق قوانین کو جدید تقاضوں سے ہم آہنگ کیا جا رہا ہے۔

پاکستان منرلز انویسٹمنٹ فورم سے خطاب کرتے ہوئے وزیراعظم آزاد کشمیر سید افتخار گیلانی نے کہا کہ آزاد کشمیر میں یاقوت (روبی) کے بڑے ذخائر پائے جاتے ہیں، جبکہ گرینائٹ، ٹورملین اور پکھراج (ٹوپاز) جیسے نایاب اور قیمتی پتھروں کے ذخائر بھی وافر مقدار میں موجود ہیں۔ انہوں نے مزید کہا کہ خطے میں سیمنٹ کی صنعت، کوئلے اور باکسائٹ کے شعبوں میں بھی سرمایہ کاری کی بہت زیادہ استعداد موجود ہے، اور حکومت سرمایہ کاروں کو سہولیات فراہم کرنے کے لیے قانونی ڈھانچے کو ہم آہنگ کر رہی ہے۔

اس موقع پر وزیراعلیٰ گلگت بلتستان امجد حسین نے اظہارِ خیال کرتے ہوئے کہا کہ جغرافیائی محلِ وقوع کے لحاظ سے گلگت بلتستان ایک انتہائی اہم اور اسٹریٹجک خطہ ہے، جہاں معدنی وسائل کے شعبے میں ترقی اور بیرونی سرمایہ کاری کی بے پناہ صلاحیت موجود ہے۔ دریں اثنا، سیکرٹری پٹرولیم نے کہا کہ پاکستان قدرتی معدنیات کی دولت سے مالا مال ہے اور یہ شعبہ ملکی معاشی ترقی میں کلیدی کردار ادا کرے گا، جبکہ پاکستان منرلز انویسٹمنٹ فورم کے انعقاد سے ملکی و غیر ملکی سرمایہ کاروں کو مؤثر انداز میں راغب کیا جا سکے گا۔