نیویارک کے علاقے بروکلین میں تین منزلہ عمارت منہدم، 4 افراد ہلاک، 19 زخمی

امریکی شہر نیویارک کے معروف علاقے بروکلین میں ایک تین منزلہ عمارت منہدم ہونے کے نتیجے میں 4 افراد ہلاک اور 19 زخمی ہوگئے ہیں، جبکہ زخمیوں میں سے 4 افراد کی حالت انتہائی تشویشناک بتائی جا رہی ہے۔

امریکی میڈیا کی رپورٹس کے مطابق عمارت گرنے کے فوری بعد متاثرہ مقام پر بڑے پیمانے پر ہنگامی ریسکیو آپریشن شروع کر دیا گیا ہے، جس میں 250 سے زائد فائر فائٹرز اور امدادی اہلکار ملبے تلے دبے ممکنہ افراد کی تلاش میں حصہ لے رہے ہیں۔ موقع پر موجود عینی شاہدین کا کہنا ہے کہ عمارت منہدم ہونے سے عین قبل علاقے میں ایک زور دار دھماکے جیسی آواز بھی سنی گئی تھی۔

مقامی انتظامیہ اور قانون نافذ کرنے والے حکام نے حادثے کی اصل وجوہات اور ممکنہ دھماکے کی نوعیت جاننے کے لیے باقاعدہ تحقیقات کا آغاز کر دیا ہے، جبکہ حکام کی جانب سے واقعے میں ہلاک اور زخمی ہونے والے افراد کی شناخت تاحال ظاہر نہیں کی گئی ہے۔