میکسیکو نے تارکین وطن نہ روکے تو معاشی پابندیاں سخت کردیں گے، ٹرمپ

امریکی صدر ڈونلڈ ٹرمپ نے میکسیکو کو سخت الفاظ میں خبردار کیا ہے کہ امریکا کی جانب بڑھنے والے غیر قانونی تارکینِ وطن کے قافلوں کو فوری طور پر روکا جائے، بصورت دیگر میکسیکو سے درآمدات پر عائد محصولات (ٹیرف) دوگنا کر دیے جائیں گے۔

سوشل میڈیا پلیٹ فارم ‘ٹروتھ سوشل’ (Truth Social) پر جاری کردہ اپنے ایک بیان میں صدر ٹرمپ نے دوٹوک مؤقف اختیار کرتے ہوئے کہا کہ امریکا میں غیر قانونی تارکینِ وطن کو ہرگز داخلے کی اجازت نہیں دی جائے گی۔ انہوں نے یہ دعویٰ بھی کیا کہ حالیہ امریکی وسط مدتی انتخابات میں ریپبلکن پارٹی کی شکست کے بعد سرحد کی جانب بڑھنے والے تارکینِ وطن کے قافلے ایک بار پھر متحرک اور سرگرم ہو گئے ہیں۔

صدر ڈونلڈ ٹرمپ کے مطابق ان قافلوں کی روک تھام اور سرحدی تحفظ یقینی بنانے کے لیے میکسیکو کی حکومت، امریکی ریاست ٹیکساس کے گورنر اور امریکی بارڈر پیٹرول حکام کو باضابطہ طور پر آگاہ اور الرٹ کر دیا گیا ہے۔