ایران پالیسی پر سوالات، اتحادی امریکی صدر کی سفارتی حکمت عملی سے ناخوش

امریکی اخبار ’واشنگٹن پوسٹ‘ کی رپورٹ کے مطابق مشرق وسطیٰ میں جنگ کے خاتمے میں ناکامی اور غیر مستقل سفارتی حکمتِ عملی کے باعث خلیجی ممالک امریکی صدر ڈونلڈ ٹرمپ سے شدید مایوس اور ناخوش ہو گئے ہیں۔ رپورٹ کے مطابق سعودی عرب، متحدہ عرب امارات، قطر، کویت اور بحرین میں امریکی پالیسیوں کو لے کر شدید بے چینی پائی جاتی ہے اور کئی ممالک نے اپنی سرزمین پر قائم امریکی فوجی اڈوں کی میزبانی اور انہیں برقرار رکھنے پر تحفظات ظاہر کرتے ہوئے ان پر نظرثانی کا غور شروع کر دیا ہے۔

اخبار کی رپورٹ میں مکہ دفاعی معاہدے کو امریکہ کے لیے ایک اہم پیغام قرار دیتے ہوئے کہا گیا ہے کہ خلیجی ممالک اب اپنی دفاعی سیکیورٹی کے لیے صرف امریکہ پر انحصار نہیں کرنا چاہتے۔ خلیجی حکام کا کہنا ہے کہ صدر ٹرمپ نے ایران کے خلاف بارہا فوجی کارروائی کی دھمکیاں دیں اور پھر مذاکرات میں پیشرفت کا حوالہ دے کر پیچھے ہٹ گئے، جس کے باعث امریکی انتظامیہ کی ایران پالیسی کو غیر مستقل، غیر متوقع اور ناقابلِ بھروسہ سمجھا جا رہا ہے۔