آزاد کشمیر، جی بی میں سست انٹرنیٹ اور ٹیلی کام سروسز میں خلل کی وجوہات سامنے آگئیں

مظفرآباد/گلگت: آزاد جموں و کشمیر (AJK) اور گلگت بلتستان (GB) میں گزشتہ کئی ماہ سے جاری سست انٹرنیٹ اور ٹیلی کام سروسز میں تعطل کی اصل اور ہولناک وجوہات باقاعدہ طور پر سامنے آ گئی ہیں۔

اسپیشل کمیونیکیشنز آرگنائزیشن (SCO) کی ایک اہم دستاویز کے مطابق، گزشتہ سال جولائی اور اگست 2025 کے دوران آزاد کشمیر اور گلگت بلتستان میں ہونے والی شدید بارشوں، لینڈ سلائیڈنگ اور سیلاب سے تباہ ہونے والا مواصلاتی انفراسٹرکچر تاحال مکمل طور پر بحال نہیں کیا جا سکا، جس کے باعث نیٹ ورک بری طرح متاثر ہے۔

ایس سی او دستاویز کے مینوئل کے مطابق متاثرہ علاقوں کی موجودہ پوزیشن درج ذیل ہےقدرتی آفات سے تباہ ہونے والے مواصلاتی نیٹ ورکس کو اس وقت ہنگامی بنیادوں پر دستیاب وسائل کے تحت عارضی انتظامات کے ذریعے چلایا جا رہا ہے۔ عارضی بحالی کے یہ اقدامات مستقل حل نہیں ہیں، جس کی وجہ سے یہ سسٹم بار بار خرابیوں کا شکار ہو رہے ہیں اور نیٹ ورک پر رش اور دباؤ مسلسل بڑھ رہا ہے۔متاثرہ اضلاع میں متعدد مواصلاتی نظام اب بھی اپنی انتہائی کم استعداد (Capacity) پر کام کر رہے ہیں، جو انٹرنیٹ کی سست رفتاری اور سروسز میں خلل کی بنیادی وجہ ہے۔

دستاویز میں سیلاب اور بارشوں کے باعث مواصلاتی تنصیبات کو پہنچنے والے بڑے پیمانے پر نقصانات کا تفصیلی مینوئل جاری کیا گیا ہے آپٹیکل فائبر اور ٹرانسمیشن انفراسٹرکچر کو پہنچنے والے نقصان کا تخمینہ 464.4 ملین روپے لگایا گیا ہے، جس میں 40 کلومیٹر زیر زمین اور 60 کلومیٹر فضائی آپٹیکل فائبر کیبل شامل ہے۔باغ۔ریڑہ، ہنزہ۔سوست، کوٹلی۔راولاکوٹ اور اوچھڑ نالہ۔داسو ڈیم کے اہم فائبر لنکس کو شدید نقصان پہنچا۔نقصانات میں 1000 پولز، ان کے متعلقہ آلات اور 54 کلومیٹر کاپر کیبل کی مکمل تباہی بھی شامل ہے۔ایس سی او کی 25 ٹیلی کام سائٹس پر قائم سول ورکس انفراسٹرکچر سیلاب کی زد میں آیا، جس کی مالیت 200 ملین روپے ہے۔ اس کے علاوہ 15 شمسی توانائی (Solar) کے سسٹمز اور 25 ارتھنگ پوائنٹس بھی تباہ ہوئے، جس سے پورے نظام کی کارکردگی متاثر ہوئی۔

ایس سی او (SCO) نے واضح کیا ہے کہ عارضی طور پر بحال کی گئی خدمات خطے کے شہریوں کی ضروریات کے لیے کافی نہیں ہیں۔ مواصلاتی نیٹ ورک کی مستقل بحالی، نظام کو دوبارہ پاؤں پر کھڑا کرنے اور بڑے پیمانے پر ہونے والے ان نقصانات کے ازالے کے لیے تنظیم نے وزارتِ انفارمیشن ٹیکنالوجی (IT) سے فوری طور پر 1018.4 ملین روپے کے اضافی فنڈز جاری کرنے کا باقاعدہ مطالبہ کر دیا ہے۔