پودوں کے سانس لینے کا عمل دیکھنا ممکن ہوگیا، سائنسدانوں کا انکشاف

سائنسدانوں نے پہلی مرتبہ پودوں کے سانس لینے کے عمل کو براہِ راست دیکھنے اور ریکارڈ کرنے میں کامیابی حاصل کر لی ہے۔ نئی سائنسی تحقیق کے ذریعے پودوں کے پتوں میں موجود باریک سوراخوں کی سرگرمی کو حقیقی وقت میں دیکھا گیا، جو ہوا اور پانی کے تبادلے میں بنیادی کردار ادا کرتے ہیں۔

یہ تحقیق امریکا کی یونیورسٹی آف الینوائے اربانا شیمپین کے سائنسدانوں نے کی، جنہوں نے ایک جدید آلہ تیار کیا ہے جس کی مدد سے پودوں کے پتوں میں موجود نہایت باریک سوراخوں، جنہیں ’سٹوماٹا‘ کہا جاتا ہے، کی حرکت اور سرگرمی کو واضح طور پر دیکھا جا سکتا ہے۔ یہ سوراخ پودوں میں گیسوں کے لین دین کا ذریعہ ہوتے ہیں۔

تحقیقی ٹیم نے ایک ویڈیو بھی ریکارڈ کی جس میں دیکھا جا سکتا ہے کہ پودے کس طرح کاربن ڈائی آکسائیڈ جذب کرتے ہیں اور آکسیجن اور پانی کے بخارات خارج کرتے ہیں۔ یہی عمل پودوں کے لیے خوراک بنانے اور ان کی بقا کے لیے نہایت ضروری ہوتا ہے۔

یونیورسٹی آف الینوائے کے شعبہ نباتاتی حیاتیات اور انسٹیٹیوٹ فار جینومک بائیولوجی سے وابستہ ماہر اینڈریو لیکی کے مطابق پودے دن کی روشنی میں یہ سوراخ کھولتے ہیں تاکہ خوراک تیار کر سکیں، جبکہ رات یا شدید گرمی اور خشکی کے دوران انہیں بند کر لیتے ہیں تاکہ پانی کے ضیاع سے بچا جا سکے۔ نئی مشین کی بدولت یہ عمل پہلی بار حقیقی وقت میں براہِ راست مشاہدہ کیا گیا ہے۔

تحقیق کے دوران پتے کے ایک چھوٹے حصے کو ایک خصوصی چیمبر میں رکھا گیا جہاں روشنی، درجہ حرارت، نمی اور ہوا کی مقدار کو قابو میں رکھا گیا، جس سے سائنسدانوں کو یہ سمجھنے میں مدد ملی کہ مختلف ماحولیاتی حالات میں پودے کس طرح ردِعمل دیتے ہیں۔

ماہرین کا کہنا ہے کہ پانی کی قلت اور شدید گرمی فصلوں کے لیے ایک بڑا چیلنج بنتی جا رہی ہے، اور اس تحقیق سے یہ جاننے میں مدد ملے گی کہ کون سی فصلیں کم پانی میں بھی بہتر طور پر زندہ رہ سکتی ہیں۔ سائنسدانوں کے مطابق ان نئی معلومات کی بنیاد پر مستقبل میں خشک سالی برداشت کرنے والی بہتر فصلیں تیار کی جا سکیں گی، جس سے زرعی پیداوار میں اضافہ ممکن ہوگا۔