سائنسدانوں نے فیوژن انرجی سے متعلق اہم کامیابی حاصل کرلی

چین میں سائنسدانوں نے فیوژن انرجی کے شعبے میں ایک اہم کامیابی حاصل کر لی ہے جو آئندہ نسل کی توانائی کے ذرائع کو سمجھنے میں حائل بڑی رکاوٹوں میں سے ایک کو عبور کرنے میں مدد دے سکتی ہے۔

چائنیز اکیڈمی آف سائنسز سے تعلق رکھنے والی تحقیقاتی ٹیم کے مطابق ان کے تجرباتی نیوکلیئر ری ایکٹر، جسے “مصنوعی سورج” کا نام دیا گیا ہے، نے پلازمہ کی ایسی بلند کثافت حاصل کر لی ہے جسے ماضی میں ناممکن سمجھا جاتا تھا۔ یہ پیشرفت نیوکلیئر فیوژن کو عملی توانائی کے طور پر استعمال کرنے کی سمت ایک اہم قدم قرار دی جا رہی ہے۔

نیوکلیئر فیوژن ایسا عمل ہے جو کسی نقصان دہ فضلے کے بغیر تقریباً لامحدود توانائی پیدا کرنے کی صلاحیت رکھتا ہے۔ یہ وہی قدرتی عمل ہے جو سورج میں مسلسل جاری رہتا ہے، تاہم زمین پر اسی عمل کو بڑے پیمانے پر مستحکم انداز میں دہرانا سائنسدانوں کے لیے ہمیشہ ایک بڑا چیلنج رہا ہے۔

رپورٹ کے مطابق گزشتہ چند برسوں میں اس میدان میں نمایاں پیشرفت دیکھنے میں آئی ہے۔ انہی کامیابیوں میں شامل ایک اہم سنگِ میل گزشتہ سال اس وقت عبور کیا گیا جب چین کے مصنوعی سورج نے پہلی بار ایک ہزار سیکنڈ سے زائد عرصے تک کامیابی سے کام کیا، تاہم بعد ازاں یہ ریکارڈ فرانس کی ویسٹ (WEST) فیوژن مشین نے توڑ دیا تھا۔

ماہرین کا کہنا ہے کہ پلازمہ کی زیادہ کثافت کا حصول فیوژن ری ایکٹرز کو زیادہ مؤثر اور مستحکم بنانے میں کلیدی کردار ادا کرے گا، جو مستقبل میں صاف، محفوظ اور پائیدار توانائی کے حصول کی راہ ہموار کر سکتا ہے۔