سائنسدانوں کی نئی دریافت نے 300 سال پرانا قانون توڑ ڈالا

کونسٹانز: یونیورسٹی آف کونسٹانز کے سائنس دانوں نے ایک ایسی انقلابی تحقیق پیش کی ہے جس نے گزشتہ 300 برسوں سے رگڑ کے بارے میں رائج بنیادی تصورات کو بدل کر رکھ دیا ہے۔ ماہرین نے ایک بالکل نئی قسم کی ‘سلائڈنگ فرکشن’ (Sliding Friction) کی نشاندہی کی ہے، جو دو اشیاء کے درمیان کسی طبعی رابطے (Physical Contact) کے بغیر ہی پیدا ہوتی ہے۔

طبیعیات کے معروف ‘ایمنٹنز لا’ (Amontons’s Law) کے تحت اب تک یہ سمجھا جاتا رہا ہے کہ رگڑ کا براہِ راست تعلق بوجھ یا وزن سے ہوتا ہے؛ یعنی جتنا زیادہ دباؤ ہوگا، رگڑ اتنی ہی زیادہ ہوگی۔ تاہم، نئی تحقیق کے نتائج بتاتے ہیں کہ رگڑ ہمیشہ وزن کے ساتھ نہیں بڑھتی۔ ماہرین کے مطابق، جب کسی اندرونی نظام میں مقناطیسی ترتیب (Magnetic Order) خراب ہو جاتی ہے، تو رگڑ اپنی انتہا پر پہنچ سکتی ہے، چاہے بوجھ کم ہی کیوں نہ ہو۔

اس دریافت کی تصدیق کے لیے محققین نے ایک منفرد ‘ٹیبل ٹاپ’ تجربہ ترتیب دیا، جس میں مقناطیسی عناصر کی دو تہوں کو ایک دوسرے کے اوپر رکھا گیا۔ حیران کن طور پر یہ تہیں کبھی ایک دوسرے کو چھوتی نہیں تھیں، لیکن ان کے درمیان مقناطیسی تعامل (Magnetic Interaction) ایک ایسی مزاحمتی قوت پیدا کر رہا تھا جسے باآسانی ناپا جا سکتا تھا۔ ماہرین کا کہنا ہے کہ یہ دریافت نینو ٹیکنالوجی اور مشینری کے ڈیزائن میں نئی راہیں کھولے گی، جہاں بغیر چھوئے حرکت اور توانائی کی بچت کو یقینی بنایا جا سکے گا۔