استحکامِ پاکستان پارٹی میں شمولیت کے فوراً بعد سابق وزیراعظم آزاد کشمیر سردار تنویر الیاس کو بڑا عہدہ مل گیا

استحکامِ پاکستان پارٹی (IPP) میں شمولیت اختیار کرنے والے آزاد جموں و کشمیر کے سابق وزیر اعظم سردار تنویر الیاس کو پارٹی میں اہم ترین تنظیمی عہدے سے نواز دیا گیا ہے۔

پارٹی قیادت کی جانب سے جاری کردہ نوٹیفکیشن کے مطابق سردار تنویر الیاس کو استحکامِ پاکستان پارٹی آزاد کشمیر کا صدر مقرر کر دیا گیا ہے، جبکہ نثار عنصر ابدالی کو کشمیر چیپٹر کا جنرل سیکرٹری نامزد کیا گیا ہے۔

واضح رہے کہ سردار تنویر الیاس نے وفاقی وزیر اور استحکامِ پاکستان پارٹی کے سربراہ عبدالعلیم خان سے ایک اہم ملاقات کی تھی، جس کے بعد انہوں نے اپنے قریبی سیاسی ساتھیوں سمیت باضابطہ طور پر آئی پی پی میں شمولیت کا اعلان کیا تھا۔ سیاسی تجزیہ کاروں کے مطابق سردار تنویر الیاس کو صدارت کا قلمدان سونپے جانے سے آزاد کشمیر کی سیاست میں استحکامِ پاکستان پارٹی کا گراف مضبوط ہونے کا امکان ہے۔