شوہر گھر میں جنات لے آئے، ثنا عسکری کا دلچسپ انکشاف

پاکستانی اداکارہ ثنا عسکری نے ایک پروگرام میں گفتگو کرتے ہوئے اپنے شوہر اور جنات سے متعلق ایک دلچسپ واقعہ سنایا جس نے مداحوں کو حیران کر دیا۔

ثنا عسکری کی شادی فنکار منہاج عسکری سے ہوئی ہے۔ دونوں اپنے اپنے شعبوں میں کامیاب کیریئر رکھتے ہیں۔ اداکارہ اپنی خوش مزاج شخصیت کے باعث مختلف مارننگ شوز میں شرکت کرتی رہتی ہیں اور اکثر اپنی ذاتی زندگی کے دلچسپ تجربات مداحوں کے ساتھ شیئر کرتی ہیں۔حال ہی میں وہ معروف اداکار اور میزبان فیصل قریشی کی رمضان ٹرانسمیشن میں بطور مہمان شریک ہوئیں جہاں انہوں نے بتایا کہ ان کے شوہر کو ڈراؤنی کہانیاں بنانے اور سنانے کا خاص شوق ہے۔ اس مقصد کے لیے انہوں نے اپنے گھر میں ایک اسٹوڈیو بھی بنا رکھا ہے جہاں وہ خوفناک کہانیوں پر مبنی ویڈیوز تیار کرتے ہیں۔ثنا عسکری نے بتایا کہ ان کا بیٹا بھی اب بڑا ہو رہا ہے اور وہ اکثر اپنے والد کے اس کام میں دلچسپی لیتا ہے، کبھی کبھار دونوں مل کر انہیں ڈرانے کی کوشش بھی کرتے ہیں جس سے گھر کا ماحول مزید دلچسپ ہو جاتا ہے۔اداکارہ نے ایک عجیب واقعہ بھی بیان کیا۔ ان کے مطابق چند ماہ قبل انہیں ایسا محسوس ہوا جیسے گھر میں کسی نے انہیں ان کے شوہر کی آواز میں پکارا ہو، حالانکہ اس وقت ان کے شوہر وہاں موجود نہیں تھے۔ثنا عسکری نے مزاحیہ انداز میں کہا کہ لگتا ہے ان کے شوہر نے گھر کا ماحول ہی ایسا بنا دیا ہے جو “جنات کے لیے دوستانہ” ہو گیا ہے، جس پر پروگرام میں موجود افراد بھی ہنس پڑے