فولڈ ایبل کے بعد اب رولیبل فون؟ سام سنگ کی نئی ڈیوائس نے تہلکہ مچا دیا

تکنیکی دنیا کی معروف کمپنی سام سنگ کے آئندہ انوویٹو اسمارٹ فونز سے متعلق نئی سنسنی خیز لیکس سامنے آئی ہیں، جن کے مطابق کمپنی سال 2027 کے دوران پانچ مختلف فولڈ ایبل اور نیکسٹ جنریشن فلیگ شپ ڈیوائسز پر کام کر رہی ہے۔ تاہم، ان معلومات کی تاحال کمپنی کی جانب سے سرکاری تصدیق نہیں کی گئی۔

غیر ملکی خبر رساں ایجنسی کے مطابق لیک ہونے والی ان ڈیوائسز کے کوڈ نیمز ‘کیو نائن بی’ (Q9B)، ‘کیو نائن اے’ (Q9A)، ‘ایچ نائن’ (H9)، اور ‘زیڈ نائن’ (Z9) سامنے آئے ہیں۔ ذرائع کے مطابق ‘بی نائن’ ممکنہ طور پر گلیکسی زیڈ فلپ 9 (Galaxy Z Flip 9) جبکہ ‘ایچ نائن’ گلیکسی زیڈ فولڈ 9 (Galaxy Z Fold 9) کا کوڈ نیم ہو سکتا ہے، کیونکہ گزشتہ ماڈلز کے کوڈ نیم بالترتیب B8 اور H8 تھے۔

لیک میں مزید دعویٰ کیا گیا ہے کہ ‘کیو نائن اے’ اور ‘کیو نائن بی’ ممکنہ طور پر گلیکسی زیڈ فولڈ 9 الٹرا اور ٹرائی فولڈ 2 (Tri-Fold 2) کے مختلف ورژنز ہو سکتے ہیں۔

ان تمام تر افواہوں میں سب سے زیادہ توجہ ‘زیڈ نائن’ (Z9) کوڈ نیم والی ڈیوائس نے حاصل کی ہے، جس کے بارے میں قیاس آرائیاں کی جا رہی ہیں کہ یہ ایک منفرد ٹیبلیٹ نما ڈیوائس ہو سکتی ہے۔ ٹیک ماہرین کے مطابق زیڈ نائن سام سنگ کی پہلی ‘رولیبل ڈسپلے’ (Rollable Display) ٹیکنالوجی پر مبنی ڈیوائس ہو سکتی ہے، جس میں اسکرین کو فولڈ کرنے کے بجائے رول کیا جا سکے گا۔ سام سنگ نے فی الحال ان لیکس پر کوئی باضابطہ ردعمل جاری نہیں کیا ہے، اس لیے انہیں غیر مصدقہ رپورٹس اور ممکنہ منصوبوں کے طور پر دیکھا جا رہا ہے۔