سلمان کے والد کو کئی ہفتوں بعد ہسپتال سے ڈسچارج کر دیا گیا، گھر منتقل

ممبئی: بالی وڈ کے معروف اداکار سلمان خان کے والد سلیم خان برین ہیمرج کے باعث 17 فروری کو ہسپتال داخل ہوئے تھے اور اب صحتیابی کے بعد اپنے گھر منتقل ہو گئے ہیں۔

بھارتی میڈیا کے مطابق 90 سالہ سلیم خان ممبئی کے لیلاوتی ہسپتال میں زیر علاج تھے۔ دوران علاج انہیں احتیاطی طور پر آئی سی یو میں رکھا گیا اور وینٹی لیٹر پر علاج کیا گیا، جس میں ڈاکٹروں نے ان کی عمر کو مدنظر رکھتے ہوئے مکمل نگرانی کی۔

منگل کی صبح سلمان خان ہسپتال پہنچے اور دوران علاج ان کے دوسرے بچے ارباز خان، الویرا اور ارپیتا، داماد اتول اگنی ہوتری اور ایوش شرما بھی ان کی عیادت کے لیے آئے۔ سلیم خان کی اہلیہ سلمیٰ خان اور ہیلن بھی علاج کے دوران ان کے ساتھ موجود رہیں۔

سلیم خان کے دیرینہ ساتھی جاوید اختر کے علاوہ بالی وڈ کی متعدد معروف شخصیات جیسے عامر خان، شاہ رخ خان، سچن ٹنڈولکر کی اہلیہ انجلی ٹنڈولکر اور سنجے دت بھی ان کی عیادت کے لیے پہنچیں۔

ڈاکٹروں کے مطابق سلیم خان کا علاج کامیابی سے مکمل ہوا ہے اور اب وہ گھر میں آرام کر رہے ہیں۔