سیفی حسن کی اپنی ہی دوسری شادی کی افواہ پھیلانے کی خواہش

پاکستان شوبز انڈسٹری کے سینئر اداکار و ہدایت کار سیفی حسن نے اپنی ہی دوسری شادی کی افواہ پھیلانے کی خواہش ظاہر کر دی۔

نجی ٹی وی کے ایک مزاحیہ پروگرام میں گفتگو کرتے ہوئے سیفی حسن نے مختلف سوالات کے دلچسپ اور مزاحیہ انداز میں جواب دیے۔ میزبان کی جانب سے پوچھا گیا کہ اگر انہیں اپنے بارے میں کوئی افواہ پھیلانی ہو تو وہ کیا ہوگی، جس پر انہوں نے مسکراتے ہوئے کہا کہ وہ یہی افواہ پھیلائیں گے کہ ان کی دوسری شادی ہو گئی ہے، کم از کم اس سے دل تو خوش ہو جائے گا۔

ایک اور سوال کے جواب میں انہوں نے کہا کہ اگر انہیں پوری زندگی ایک ہی لفظ بولنا پڑے تو ابھی اس بارے میں سوچا نہیں، تاہم انہوں نے اپنی مونچھوں سے متعلق دلچسپ بات کرتے ہوئے کہا کہ وہ بغیر مونچھوں کے بالکل اچھے نہیں لگتے، اس لیے کبھی مونچھیں نہیں کٹوائیں اور نہ ہی کٹوائیں گے۔

سیفی حسن نے اپنی نوجوانی کا ایک واقعہ بھی سنایا کہ وہ گھر کے اسٹور میں چھپ کر سگریٹ پیا کرتے تھے، جہاں تھرموپول کے بلاکس رکھے ہوتے تھے۔ انہوں نے بتایا کہ سگریٹ کی وجہ سے تھرموپول میں سوراخ ہو گئے، جنہیں چھپانے کے لیے سپرے بھی کیا، لیکن بعد میں کزن نے دیکھ لیا اور معاملہ والد تک پہنچ گیا، جس پر انہیں سخت سزا بھی ملی۔