سعدیہ امام کا ساتھی اداکاروں کی جانب سے دھوکا دیے جانے کا انکشاف

پاکستان کی سینئر اداکارہ اور معروف ٹی وی ہوسٹ سعدیہ امام نے انکشاف کیا ہے کہ شوبز انڈسٹری میں اپنے طویل اور کامیاب کیریئر کے دوران انہیں اپنے ہی قریبی مرد ساتھیوں اور دوستوں کی جانب سے دھوکا دینے، پیٹھ پیچھے باتیں کرنے اور نظر انداز کیے جانے کا سامنا کرنا پڑا۔

سعدیہ امام نے یہ سنسنی خیز انکشافات ایک نجی ٹی وی کے مارننگ شو میں گفتگو کرتے ہوئے کیے۔ اپنے ماضی کے تلخ تجربات شیئر کرتے ہوئے اداکارہ نے کہا کہ جب انہوں نے انڈسٹری میں قدم رکھا تو اس وقت ان کی ہم عمر خواتین فنکاروں کی تعداد بہت کم تھی، یا تو انتہائی سینئر اداکارائیں تھیں یا پھر بالکل جونیئر۔ اس صورتحال کے باعث ڈراما سیٹ اور شوبز سرکلز میں ان کے زیادہ تر دوست اور ساتھی مرد فنکار ہی تھے۔

سعدیہ امام کا کہنا تھا کہ انہیں سب سے زیادہ دکھ اور صدمہ ان لوگوں کے رویے سے پہنچا جو ان کے گھر آتے جاتے، ساتھ کھانا کھاتے اور قریبی دوست سمجھے جاتے تھے، لیکن وہی پسِ پردہ ان کے خلاف سازشیں اور باتیں کرتے تھے۔ اداکارہ نے بتایا کہ کئی مرتبہ انہوں نے اپنے مرد ساتھیوں کو خود یہ کہتے ہوئے سنا کہ “سعدیہ امام کو کاسٹ نہ کیا جائے کیونکہ وہ پارٹی گرل نہیں ہیں اور شوٹنگ کے دوران الگ تھلگ رہتی ہیں”۔

انہوں نے مزید بتایا کہ اس دور میں ڈراموں کی شوٹنگز کے لیے اکثر ٹیموں کو بیرونِ ملک جانا پڑتا تھا۔ بعض ڈائریکٹرز اور ساتھیوں کو ان کے سنجیدہ رویے اور طرزِ زندگی سے مسئلہ ہوتا تھا کیونکہ وہ ایسی لڑکیوں کو ترجیح دیتے تھے جو ان کے ساتھ زیادہ دوستانہ اور فري مکس ہوں۔ اسی وجہ سے انہیں کئی اہم ڈراما پروجیکٹس سے نکال دیا جاتا یا پھر مرکزی کردار کی بجائے دوسرے درجے کے روز دیے جاتے تھے۔

اداکارہ نے اپنے والد کے دانشمندانہ مشورے کو یاد کرتے ہوئے کہا کہ ان کے والد ہمیشہ کہتے تھے کہ “جعلی دوست رکھنے سے بہتر ہے انسان اکیلا رہے”۔ اگرچہ اس وقت انہیں یہ بات سمجھ نہیں آتی تھی، لیکن وقت کے ساتھ ساتھ زندگی کے ان تجربات نے انہیں بہت کچھ سکھا دیا اور اللہ کے فضل سے وہ مشکل وقت گزر گیا۔