علی انصاری کی بیٹی کی پہلی سالگرہ، تصاویر سوشل میڈیا پر وائرل

کراچی: اداکارہ صبور علی اور علی انصاری نے اپنی بیٹی سرینا کی زندگی کے پہلے سال کی تکمیل پر ایک پروقار اور سادہ تقریب کا انعقاد کیا۔ انسٹاگرام پر شیئر کی گئی تصاویر میں دیکھا جا سکتا ہے کہ ننھی سرینا اپنے والدین کی گود میں اور کھلونوں کے ساتھ کھیلتے ہوئے بیحد خوش نظر آ رہی ہیں۔ اس موقع پر صبور علی کی بہن اور معروف اداکارہ سجل علی کی موجودگی نے تقریب کو چار چاند لگا دیے۔

صبور علی نے تصاویر شیئر کرتے ہوئے ایک طویل اور دل کو چھو لینے والا کیپشن تحریر کیا۔ انہوں نے اعتراف کیا کہ وہ اس الجھن میں تھیں کہ ان نجی لمحات کو دنیا کے ساتھ شیئر کریں یا صرف اپنے دل میں محفوظ رکھیں، لیکن بیٹی کے لیے ان کی محبت اتنی گہری تھی کہ وہ اسے بیان کیے بغیر نہ رہ سکیں۔ صبور نے لکھا کہ “بے خواب راتوں سے لے کر سرینا کی گرمجوش آغوش تک، ہر لمحہ ایک جادو کی مانند رہا ہے”۔

اداکارہ نے مزید لکھا کہ وہ آج بھی اس بات پر حیران ہیں کہ ایک چھوٹی سی جان کیسے ان کی پوری کائنات بن گئی ہے۔ انہوں نے اپنی بیٹی سے وعدہ کیا کہ وہ اور علی انصاری ہمیشہ اس کی ڈھال بن کر رہیں گے اور ہر مشکل میں اس کی رہنمائی کریں گے۔ یاد رہے کہ جنوری 2022 میں رشتہ ازدواج میں بندھنے والی یہ جوڑی سوشل میڈیا پر اپنی کیمسٹری اور خاندانی اقدار کی وجہ سے بیحد پسند کی جاتی ہے۔