صباحت بخاری نے بیٹی سے علیحدگی کی تکلیف دہ داستان بیان کر دی

پاکستان شوبز انڈسٹری کی سینئر اداکارہ صباحت بخاری نے حال ہی میں ایک پوڈ کاسٹ کے دوران اپنی پہلی شادی کی ناکامی اور اپنی بیٹی سے 30 سالہ طویل اور انتہائی دردناک علیحدگی کی داستان بیان کرتے ہوئے شائقین کو آبدیدہ کر دیا۔ انہوں نے انکشاف کیا کہ لاہور میں ان کی پہلی شادی مختصر عرصے کے بعد طلاق پر ختم ہوئی تو سسرال والوں نے ان کی محض ڈیڑھ سال کی شیر خوار بیٹی کو ان سے زبردستی چھین لیا۔ اداکارہ نے بتایا کہ انہوں نے بچی کی تحویل کے لیے عدالتوں کا بھی رخ کیا اور قانون کی مدد لی، لیکن انہیں کبھی اپنی معصوم بیٹی سے ملنے نہیں دیا گیا۔

صباحت بخاری نے مزید بتایا کہ سسرال والے بعد میں اپنا گھر تبدیل کر کے کسی نامعلوم مقام پر منتقل ہو گئے، جس کے باعث وہ اپنی بیٹی کی کوئی معلومات حاصل نہ کر سکیں۔ ان کے سابق شوہر نے بیٹی کو یہ کہہ کر بڑا کیا کہ اس کی ماں کا انتقال ہو چکا ہے۔ تاہم، 30 برس بعد جب ان کے سابق شوہر کا انتقال ہوا، تو سسرال کے کچھ رشتہ داروں نے لڑکی کو سچائی بتائی۔ جس کے بعد بیٹی نے سوشل میڈیا پلیٹ فارمز کے ذریعے اپنی والدہ کو تلاش کر کے ان سے رابطہ قائم کیا۔ اداکارہ کے مطابق اب وہ شادی شدہ ہے اور بالآخر دہائیوں کی جدائی کے بعد ان کا اپنی بیٹی سے دوبارہ رابطہ ممکن ہو سکا ہے۔