صبا قمر اور یاسر حسین کی قوالی نائٹ میں رقص کی ویڈیو وائرل

پاکستانی شوبز انڈسٹری کی نامور اداکارہ صبا قمر اور معروف اداکار و ہدایت کار یاسر حسین کی ایک قوالی نائٹ میں شرکت کی دلچسپ ویڈیو سوشل میڈیا پر تیزی سے وائرل ہو رہی ہے، جس میں دونوں فنکار محفل میں موسیقی، گائیکی اور رقص سے بھرپور لطف اندوز ہوتے دکھائی دے رہے ہیں۔

سوشل میڈیا پر سامنے آنے والی ویڈیو میں دونوں اداکاروں کی بے تکلفی اور خوش مزاجی نے تقریب کی رونق کو دوبارہ دوبالا کر دیا۔ محفل میں اس وقت خاص سحر طاری ہو گیا جب استاد نصرت فتح علی خان کی شہرۂ آفاق صوفیانہ قوالی “تیرے بن نہیں لگدا دل میرا ڈھولنا” پیش کی گئی، جس پر صبا قمر اور یاسر حسین کو جھومتے اور محفل سے محظوظ ہوتے دیکھا جا سکتا ہے۔

تقریب کے لیے صبا قمر نے گہرے میرون رنگ کی خوبصورت میکسی کا انتخاب کیا، جبکہ یاسر حسین نے سیاہ رنگ کا روایتی مشرقی لباس زیب تن کر رکھا تھا۔ تقریب کا مقام بھی سنہری روشنیوں، پھولوں کی خوبصورت آرائش اور چھت پر تاروں بھرے آسمان کی مانند سجائی گئی سفید لائٹس کے باعث انتہائی دلکش منظر پیش کر رہا تھا۔

ویڈیو وائرل ہوتے ہی جہاں مداحوں نے دونوں فنکاروں کی کیمسٹری اور بے ساختہ انداز کو بے حد پسند کیا اور ان کی ویڈیو کو سراہا، وہی بعض سوشل میڈیا صارفین نے محفل میں ان کے بے باک اور خوش طبع انداز پر اعتراض کرتے ہوئے انہیں تنقید کا نشانہ بھی بنایا۔