صبا قمر کا ماضی میں ساتھی اداکار کی محبت میں گرفتار ہونے کا انکشاف

پاکستان شوبز انڈسٹری کی معروف اور ورسٹائل اداکارہ صبا قمر نے ماضی میں ایک فلم کے دوران اپنے ساتھی اداکار کی محبت میں مبتلا ہونے کا زبردست انکشاف کیا ہے۔ متعدد کامیاب اور مقبول ڈراموں میں اداکاری کا لوہا منوانے والی صبا قمر ان دنوں برطانیہ کے دورے پر ہیں، جہاں انہوں نے ایک چیریٹی تقریب میں شرکت کی اور اپنے مداحوں کے مختلف سوالات کے کھل کر جوابات دیے۔

تقریب کے دوران گفتگو کرتے ہوئے صبا قمر نے بتایا کہ چند سال قبل جب وہ ایک فلم کی شوٹنگ کر رہی تھیں، تو انہیں اپنے کوسٹار سے محبت ہو گئی تھی۔ اداکارہ نے ساتھی فنکار کا نام بتانے سے گریز کرتے ہوئے مسکراتے ہوئے کہا کہ وہ اب شادی شدہ ہیں، اس لیے اگر انہوں نے نام ظاہر کیا تو ان کی اہلیہ ان کے لیے مشکلات پیدا کر سکتی ہیں۔ صبا قمر کا مزید کہنا تھا کہ جب انہوں نے اس معاملے کا ذکر اپنی بھانجی سے کیا، تو اس نے مشورہ دیا کہ وہ محض ایک فلمی شوٹنگ کا ماحول تھا، اس لیے انہیں اسے بھول کر اپنی زندگی میں آگے بڑھنا چاہیے۔ اداکارہ کا یہ بیان سوشل میڈیا پر تیزی سے وائرل ہو رہا ہے اور صارفین مختلف شادی شدہ اداکاروں کے نام لے کر قیاس آرائیاں کر رہے ہیں۔