ساس بہو کے ڈراموں پر زیادہ تر تنقید مرد کرتے ہیں: ثمینہ احمد

کراچی: سینئر اداکارہ ثمینہ احمد نے پاکستانی ٹی وی پر نشر ہونے والے ساس بہو کے موضوعات پر مبنی ڈراموں کی حمایت کرتے ہوئے کہا ہے کہ یہ ڈرامے خواتین کے حقوق کی آگاہی اور بااختیار بنانے میں مددگار ثابت ہوئے ہیں۔

ثمینہ احمد نے کہا کہ زیادہ تر تنقید مرد حضرات کی طرف سے آتی ہے، جو خود ڈرامے دیکھتے بھی نہیں لیکن خواتین کے مسائل پر مبنی ڈراموں پر تنقید کرتے ہیں۔ اداکارہ کے مطابق یہ ڈرامے خواتین کی زندگی کی کہانی بیان کرتے ہیں اور معاشرتی تبدیلی میں کردار ادا کرتے ہیں۔

انہوں نے مزید کہا کہ اب بہت سی خواتین اداکاری میں قدم رکھ رہی ہیں، اور سیٹ پر بھی خواتین کی موجودگی بڑھ رہی ہے، جو ایک مثبت تبدیلی ہے۔