روسی کمپنی کا کبوتروں کو نگران ڈرون میں تبدیل کرنے کا دعویٰ

ایک روسی کمپنی نے حال ہی میں دعویٰ کیا ہے کہ اس نے کبوتروں کو نگرانی کے لیے استعمال ہونے والے جدید ڈرونز میں تبدیل کر دیا ہے، جنہیں حیاتیاتی ڈرون یا بائیو ڈرون کہا جا رہا ہے۔
تفصیلات کے مطابق روسی نیورو ٹیکنالوجی کمپنی ’Neiry Group‘ نے کبوتروں کے دماغ میں خصوصی امپلانٹس نصب کیے ہیں، جن کے ذریعے ان کی پرواز کو دور سے کنٹرول کیا جا سکتا ہے۔ ان کبوتروں کو چھوٹے کیمروں، جی پی ایس اور سولر پاور کنٹرول سسٹم سے بھی لیس کیا گیا ہے تاکہ وہ روایتی ڈرونز کی طرح لائیو ویڈیو فراہم کر سکیں۔
کمپنی کے مطابق برقی سگنلز کے ذریعے کبوتروں کو مخصوص سمتوں میں موڑنے یا خاص راستوں پر لے جانے کی ہدایات دی جا سکتی ہیں، جس کے لیے کسی پائلٹ یا تربیت کی ضرورت نہیں۔
Neiry Group کا کہنا ہے کہ یہ بائیو ڈرونز عام ڈرونز کے مقابلے میں زیادہ دیر تک پرواز کر سکتے ہیں اور محدود فضائی علاقوں میں بھی مؤثر انداز میں کام کر سکتے ہیں۔