روس میں 5 جی سروس کا باضابطہ آغاز، ایک کروڑ شہریوں کو سہولت دستیاب

ماسکو: صدر ولادیمیر پوتن کی خصوص ہدایت پر روس میں پانچویں نسل کی موبائل مواصلاتی سروس (5G) کا باضابطہ آغاز کر دیا گیا ہے، جس سے پہلے مرحلے میں دارالحکومت ماسکو اور سینٹ پیٹرزبرگ سمیت 16 اہم شہروں کے تقریباً 1 کروڑ شہریوں کو تیز ترین موبائل انٹرنیٹ کی سہولت دستیاب ہو گئی ہے۔

روس کی وزارتِ ڈیجیٹل ترقی، مواصلات اور ذرائع ابلاغ کے مطابق 5 جی سروس محض انٹرنیٹ کی رفتار بڑھانے کا ذریعہ نہیں بلکہ یہ خودکار گاڑیوں، روبوٹک سسٹمز، ٹیلی میڈیسن اور صنعتی شعبے کو جدید بنانے کے لیے تیار کردہ معاشی ڈیجیٹل تبدیلی کا جامع نظام ہے۔آپریٹرز کو 5G کی فراہمی کے لیے 4.63 سے 4.99 گیگا ہرٹز (GHz) کا فریکوئنسی بینڈ تمام کمپنیوں میں مساوی اور بلامعاوضہ تقسیم کیا گیا ہے تاکہ مارکیٹ میں صحت مندانہ مسابقت قائم رہے اور صارفین کو مناسب نرخوں پر سروس مل سکے۔ ابتدائی مرحلے میں 5G نیٹ ورک ماسکو، سینٹ پیٹرزبرگ، تویر، نووسیبیرسک، یکاتیرنبرگ، قازان، سمارا، یاروسلاول، اوفا، وولگوگراد، کراسنویارسک، پرم، چیلیابنسک، ویلیکی نووگورود، نزنی نووگورود اور کراسنودار میں چالو کیا گیا ہے۔ روس کی چار بڑی ٹیلی کام کمپنیاں—ایم ٹی ایس (MTS)، میگافون (MegaFon)، بی لائن (Beeline)، اور ٹی ٹو (T2)—یہ سروس فراہم کر رہی ہیں۔ اینڈرائیڈ صارفین کو جلد نیٹ ورک تک رسائی مل جائے گی جبکہ آئی فون صارفین کے لیے 5G کی دستیابی ایپل (Apple) کے فیصلے پر منحصر ہوگی۔ روس کے نائب وزیراعظم دیمتری گریگورینکو اور وزیر ڈیجیٹل ترقی مکسوت شادایف نے بتایا کہ حکومت کا حتمی ہدف روس میں استعمال ہونے والے 5G بیس اسٹیشنوں میں مقامی طور پر تیار کردہ آلات کا تناسب 100 فیصد تک پہنچانا ہے۔