ڈیجیٹل تفریح کی دنیا میں اہم پیشرفت، رائل ریپچی 26 دسمبر کو دبئی سے متعارف ہوگا

ڈیجیٹل تفریح کی دنیا میں ایک نئے عالمی پلیٹ فارم کی آمد کی تیاریاں مکمل کی جا رہی ہیں، جس کے تحت ‘رائل ریپچی’ نے 26 دسمبر 2026ء کو دبئی سے اپنی نئی او ٹی ٹی (OTT) سروس باقاعدہ متعارف کروانے کا اعلان کر دیا ہے۔

ابتدائی مرحلے میں اس سروس کی فراہمی کے لیے متحدہ عرب امارات (UAE) اور بھارت کو بنیادی مارکیٹوں کے طور پر منتخب کیا گیا ہے، جبکہ بعد ازاں دیگر بین الاقوامی منڈیوں تک رسائی کی توسیعی حکمتِ عملی بنائی گئی ہے۔ کمپنی کی انتظامیہ نے ناظرین کے لیے کم سے کم قیمت پر معیاری مواد کی فراہمی کا عزم ظاہر کیا ہے، جس کے تحت بھارت میں ماہانہ سبسکرپشن فیس صرف 10 بھارتی روپے اور امارات میں 5 درہم رکھنے کی تجویز ہے۔ اس منصوبے کی قیادت اماراتی بزنس ٹائیکون حمید محمد الکلبانی، دھرم گپتا اور ونے کمار کر رہے ہیں۔

المدثر نیوز ایجنسی کے مطابق دبئی کا عالمی کاروباری ماحول، جدید ترین مواصلاتی ٹیکنالوجی اور کثیر القومی آبادی اس شروعات کا اہم سبب بنی ہیں۔ رائل ریپچی انتظامیہ کا کہنا ہے کہ وہ جلد ہی اپنی اصل فلموں (Originals) اور بین الاقوامی پروڈکشن ہاؤسز کے ساتھ شراکت داری کا اعلان کرے گی۔ اگرچہ پاکستان سمیت دیگر ممالک میں اس سروس کی باقاعدہ لانچ کا شیڈول تاحال سامنے نہیں آیا، تاہم 26 دسمبر سے قبل مزید تفریحی پروگراموں اور کاروباری منصوبوں کا اعلان متوقع ہے۔