علامہ اقبال کا یومِ پیدائش، روسی طلبہ کا اردو کلام اقبال پیش کر کے خراجِ عقیدت

روس کے دارالحکومت ماسکو میں مفکرِ پاکستان، شاعرِ مشرق علامہ محمد اقبال کا 139واں یومِ پیدائش ایک شاندار اور خصوصی ادبی تقریب کے ساتھ منایا گیا، جس میں روس کی ممتاز جامعات کے طلبہ و طالبات نے اردو زبان میں کلامِ اقبال پیش کر کے عظیم فلسفی کو بھرپور خراجِ عقیدت پیش کیا۔

روسی اسٹیٹ یونیورسٹی فار دی ہیومینٹیز میں منعقدہ اس پروقار تقریب میں روس میں پاکستان کے سفیر فیصل نیاز ترمذی نے خصوصاً شرکت کی، جبکہ علامہ اقبال کے پوتے سینیٹر ولید اقبال اور نواسے میاں اقبال صلاح الدین نے ویڈیو لنک کے ذریعے آن لائن شرکت کی۔ تقریب کا سب سے منفرد اور شاندار پہلو ماسکو اسٹیٹ یونیورسٹی، ایم جی آئی ایم او (MGIMO)، اور ہائر اسکول آف اکنامکس سمیت مختلف تعلیمی اداروں میں اردو کی تعلیم حاصل کرنے والے روسی طلبہ و طالبات کی شرکت تھی، جنہوں نے درست تلفظ کے ساتھ علامہ اقبال کی نظموں کا انتخاب پیش کر کے حاضرین سے داد وصول کی۔

پاکستانی سفیر فیصل نیاز ترمذی اور دیگر مقررین نے تقریب سے خطاب کرتے ہوئے کہا کہ علامہ اقبال کی فکر کسی ایک خطے تک محدود نہیں بلکہ عالمی سطح پر ان کے فلسفے کو دوبارہ سرایا جا رہا ہے۔ انہوں نے روس کے نوجوانوں کی اردو زبان، پاکستانی ادب اور افکارِ اقبال سے گہری دلچسپی کو دونوں ممالک کے درمیان علمی و ثقافتی روابط کو فروغ دینے کے لیے ایک انتہائی حوصلہ افزا پیش رفت قرار دیا۔