پنجاب حکومت کا بڑا فیصلہ: محکمہ سکولز کو 3 حصوں میں تقسیم کرنے کی تجویز

پنجاب حکومت نے تعلیمی نظام میں اصلاحات اور انتظامی بہتری کے لیے ایک بڑا فیصلہ کرتے ہوئے محکمہ اسکول ایجوکیشن پنجاب کو 3 الگ الگ علاقائی محکموں میں تقسیم کرنے کی جامع تجویز تیار کر لی ہے۔

حکومتی دستاویزات کے مطابق، صوبے میں جنوبی، وسطی اور شمالی پنجاب کی بنیاد پر 3 خودمختار تعلیمی انتظامی ڈھانچے قائم کیے جائیں گے۔ اس نئی انتظامی تقسیم کے تحت پنجاب میں ایک صوبائی سیکرٹری کے بجائے تین علاقائی سیکرٹریز تعینات کیے جائیں گے، جن کے اپنے علیحدہ سیکرٹریٹ اور ڈائریکٹوریٹ آف پبلک انسٹرکشن (DPI) ہوں گے۔ مجوزہ منصوبے کے تحت جنوبی پنجاب کا تعلیمی مرکز ملتان، وسطی پنجاب کا لاہور اور شمالی پنجاب کا تعلیمی مرکز راولپنڈی بنایا جائے گا۔

اس منصوبے کے تحت پنجاب کی 9 ڈویژنز اور 41 اضلاع کو تین علاقوں میں تقسیم کیا جائے گا؛ جس میں جنوبی پنجاب کی 3، وسطی پنجاب کی 4 اور شمالی پنجاب کی 2 ڈویژنز شامل ہوں گی۔ ماہرین کا کہنا ہے کہ محکمہ تعلیم کی یہ علاقائی تقسیم مستقبل میں چھوٹے اور فعال انتظامی یونٹس کے قیام کے تناظر میں ایک انتہائی اہم پیش رفت ثابت ہوگی۔