نئی نسل ’’ریورس فلن ایفیکٹ‘‘ کا شکار، ذہانت کم ہونے لگی

کئی دہائیوں تک سائنس دان اس بات کا مشاہدہ کرتے رہے کہ ہر نئی نسل کے ساتھ ذہانت یا آئی کیو ٹیسٹ کے نتائج میں بتدریج بہتری آ رہی ہے، جسے سائنسی اصطلاح میں ’فلن ایفیکٹ‘ (Flynn Effect) کہا جاتا ہے۔ تاہم حالیہ برسوں میں مختلف ترقی یافتہ ممالک میں ہونے والی تحقیقات نے ایک نیا اور تشویشناک رجحان سامنے لایا ہے، جس کے مطابق بعض نوجوانوں کے آئی کیو ٹیسٹ اسکورز میں کمی یا جمود دیکھا جا رہا ہے۔ ماہرین اس جدید رجحان کو ’ریورس فلن ایفیکٹ‘ (Reverse Flynn Effect) کا نام دے رہے ہیں۔

معروف سائنسی جریدے ’انٹیلیجنس‘ (Intelligence) میں شائع ہونے والی ایک جدید تحقیق کے مطابق انسانی جینیاتی ساخت میں ایسی کوئی منفی تبدیلی نہیں آئی جو ذہانت میں کمی کی وجہ بنے۔ ماہرین نے واضح کیا کہ اس سے یہ نتیجہ اخذ کرنا درست نہیں ہو گا کہ انسان فطری یا جینیاتی طور پر کم ذہین ہو رہے ہیں۔ اصل مسئلہ ماحول، تعلیمی نظام، طرزِ زندگی اور معاشرتی تبدیلیوں سے جڑا ہوا ہے۔ جس طرح ماضی میں بہتر غذائیت، معیاری صحت کی سہولیات اور نظامِ تعلیم نے فلن ایفیکٹ کو جنم دیا تھا، اسی طرح موجودہ دور کے ماحولیاتی اثرات اور بدلتی عادات ذہنی کارکردگی پر منفی اثرات مرتب کر رہی ہیں۔

امریکا، برطانیہ، ناروے، ڈنمارک اور فن لینڈ سمیت متعدد ممالک میں کی جانے والی تحقیقات سے ثابت ہوا ہے کہ نوجوان نسل کے آئی کیو اسکورز میں اب وہ پرانی تیزی باقی نہیں رہی اور نتائج ایک حد پر آ کر رک گئے ہیں یا ان میں گراوٹ دیکھی گئی ہے۔