ریحام رفیق کا ڈپریشن سے گزرنے کا انکشاف، ذہنی صحت پر آگاہی کی اپیل

پاکستانی شوبز انڈسٹری کی ابھرتی ہوئی اداکارہ ریحام رفیق نے ڈپریشن کا سامنا کرنے کا انکشاف کرتے ہوئے ذہنی صحت سے متعلق اہم پیغام دیا ہے۔ اداکارہ نے انسٹاگرام پر ایک مختصر ویڈیو شیئر کی جس میں وہ اپنی ذہنی کیفیت سے گزرتے ہوئے نظر آئیں۔

ریحام رفیق نے مداحوں اور عوام سے اپیل کی کہ اگر کوئی شخص ذہنی مشکلات کے بارے میں بات کرے تو اس کے ساتھ نرمی برتی جائے اور اسے سنجیدگی سے لیا جائے۔ انہوں نے کہا کہ یہ ویڈیو ہمدردی کے حصول کے لیے نہیں بلکہ آگاہی پھیلانے کے مقصد سے شیئر کی گئی ہے کیونکہ ذہنی صحت کوئی ڈرامہ نہیں بلکہ ایک تلخ حقیقت ہے۔

اداکارہ کے مطابق بعض اوقات روزمرہ زندگی گزارنا بھی مشکل ہو جاتا ہے، تاہم وہ ذہنی صحت کے حوالے سے آواز اٹھاتی رہیں گی۔ ان کی پوسٹ کے بعد سوشل میڈیا پر مداحوں نے ان کے لیے نیک تمناؤں اور جلد صحت یابی کی دعاؤں کا اظہار کیا۔