اکشے کمار سے منگنی میں اب لوگوں کی دلچسپی پر حیرت ہوتی ہے، روینہ ٹنڈن

بالی ووڈ کی اداکارہ روینہ ٹنڈن نے اس بات پر حیرت کا اظہار کیا ہے کہ ان کی اور اکشے کمار کی دہائیوں پرانی منگنی آج بھی لوگوں کے لیے تجسس کا باعث کیوں بنی ہوئی ہے۔ اداکارہ کے مطابق، یہ سمجھ سے باہر ہے کہ ایک پرانا رشتہ اتنے عرصے بعد بھی زیرِ بحث رہتا ہے، جبکہ آج کے دور میں رشتوں کے بدلنے کو معمول سمجھا جاتا ہے۔

ایک پوڈکاسٹ میں گفتگو کے دوران روینہ سے ان کے ماضی کے حوالے سے سوال کیا گیا تو انہوں نے مسکراتے ہوئے کہا کہ مجھے حیرت ہے کہ اب بھی لوگ اکشے اور میری منگنی کا ذکر کرتے ہیں۔ کالجوں میں آج کل لڑکیاں ہر ہفتے بوائے فرینڈ بدلتی ہیں، مگر میری پرانی منگنی اب تک لوگوں کے ذہن میں کیوں ہے؟

روینہ نے مزید کہا کہ زندگی میں آگے بڑھ جانا فطری عمل ہے، اور طلاق یا رشتہ ختم ہونا کوئی غیر معمولی بات نہیں۔

انہوں نے بتایا کہ وہ اور اکشے آج بھی سماجی تقریبات میں خوشگوار انداز میں ملتے ہیں اور ماضی کو پیچھے چھوڑ چکے ہیں۔

ہم فلم مہرا کے دوران ایک مقبول جوڑی تھے، مگر اب دونوں اپنی زندگیوں میں خوش اور مطمئن ہیں۔

اکشے کمار سے متعلق ایک وائرل خبر پر تبصرہ کرتے ہوئے روینہ نے ہنستے ہوئے کہا میں نے وہ رپورٹ دیکھی ہی نہیں، تو بلاوجہ اپنا بلڈ پریشر کیوں بڑھاؤں؟

یاد رہے کہ روینہ ٹنڈن نے 2004 میں فلم ڈسٹری بیوٹر انیل تھنڈانی سے شادی کی تھی اور ان کے دو بچے ہیں۔ دونوں اپنی خاندانی زندگی میں مصروف اور خوشحال ہیں۔