رشمیکا مندانا نے فلم انڈسٹری میں اپنے سفر سے متعلق اہم انکشاف کردیا

جنوبی ہند اور بالی ووڈ کی معروف اداکارہ رشمیکا مندانا نے اپنے متعدد زبانوں کے فلمی سفر پر روشنی ڈالتے ہوئے کہا ہے کہ مختلف زبانوں کی انڈسٹریز میں کام کرنا ان کا کوئی باقاعدہ پلان نہیں تھا، بلکہ حالات خود انہیں ایک فلم سے دوسری زبان کے سنیما تک لے گئے۔ بھارت کی ریاست کرناٹک سے تعلق رکھنے والی 30 سالہ اداکارہ تیلگو، ہندی، کناڈا اور تامل سنیما میں کامیابی کے جھنڈے گاڑ چکی ہیں۔ رشمیکا کے مطابق زبان کبھی ان کے لیے پیشہ ورانہ رکاوٹ نہیں بنی کیونکہ ان کی مادری زبان ‘کوڈاوا’ کی اپنی کوئی باقاعدہ فلم انڈسٹری موجود نہیں ہے، جس کی وجہ سے وہ ہر زبان کو بلا جھجھک اپنی زبان کی طرح قبول کرتی ہیں۔

اداکارہ نے بتایا کہ ابتدا میں ان کے مداحوں، جنہیں وہ اپنا خاندان مانتی ہیں، نے انہیں دیگر زبانوں کی فلمیں کرنے کا مشورہ دیا، جس کے بعد ان کا سنیما کا دائرہ کار وسیع ہوتا گیا۔ اپنے لہجے (Accent) پر ہونے والے اعتراضات کے حوالے سے بات کرتے ہوئے رشمیکا کا کہنا تھا کہ وہ غیر ضروری بحث کو اہمیت دینے کے بجائے اپنے کردار اور اداکاری سے انصاف کرنے پر توجہ دیتی ہیں۔ انہوں نے واضح کیا کہ ایک اداکار کی حیثیت سے ان کی ذمہ داری صرف سیٹ پر اچھی کہانی سنانا ہے؛ فلم کی کامیابی کسی ایک شخص کی نہیں بلکہ پوری ٹیم کی مشترکہ محنت کا نتیجہ ہوتی ہے۔