رشمیکا مندانا کی شادی کے بعد پرانی آڈیو لیک، اداکارہ کی سخت وارننگ

بھارتی اداکارہ رشمیکا مندانا کی مبینہ 8 سال پرانی ذاتی آڈیو سوشل میڈیا پر وائرل ہونے کے بعد اداکارہ نے سخت ردعمل دیتے ہوئے اسے نجی زندگی میں مداخلت قرار دیا ہے۔

اداکارہ نے اپنے سوشل میڈیا اکاؤنٹس پر جاری ایک تفصیلی بیان میں کہا کہ وائرل ہونے والا آڈیو کلپ بظاہر ان افراد کی اجازت یا علم کے بغیر ریکارڈ اور شیئر کیا گیا ہے جو اس گفتگو کا حصہ تھے۔ سوشل میڈیا پر اس آڈیو کے بارے میں دعویٰ کیا جا رہا ہے کہ یہ ایک نجی گفتگو ہے جس کی آزادانہ طور پر تصدیق نہیں ہو سکی۔

رپورٹس کے مطابق اس مبینہ گفتگو میں اداکارہ کے خاندان کے ایک فرد، ممکنہ طور پر ان کی والدہ، اور ان کے ماضی کے تعلق سے متعلق بات بھی شامل ہے جو اداکار رکشت شیٹی کے ساتھ بتایا جاتا ہے۔

29 سالہ اداکارہ کا کہنا تھا کہ آن لائن پھیلائی گئی آڈیو دراصل مکمل گفتگو کا صرف ایک چھوٹا سا حصہ ہے جسے سیاق و سباق سے ہٹ کر پیش کیا جا رہا ہے۔

رشمیکا مندانا نے خبردار کیا کہ اس آڈیو کو پھیلانا ان کی نجی زندگی میں مداخلت ہے اور جو افراد اسے شیئر کر رہے ہیں انہیں قانونی نتائج کا سامنا کرنا پڑ سکتا ہے۔ انہوں نے یہ بھی کہا کہ گزشتہ 8 برسوں سے انہیں بعض میڈیا اداروں اور سوشل میڈیا صارفین کی جانب سے غلط معلومات اور تنقید کا سامنا کرنا پڑ رہا ہے۔