روینہ ٹنڈن کی بیٹی راشا تھاڈانی کا تیلگو فلم انڈسٹری میں ڈیبیو

اداکارہ روینہ ٹنڈن کی صاحبزادی راشا تھاڈانی تیلگو سنیما میں قدم رکھنے جا رہی ہیں۔ بھارتی میڈیا کے مطابق فلم آر ایس 100 کے ڈائریکٹر اجے بھوپتی اپنی نئی فلم کے ذریعے راشا تھاڈانی اور مہیش بابو کے بھتیجے جیا کرشنا کو متعارف کرا رہے ہیں۔

بتایا جا رہا ہے کہ دونوں کا یہ پروجیکٹ ایک حقیقی اور جذباتی عشق کہانی پر مبنی ہے، جس کے نام کا اعلان جلد متوقع ہے۔ اجے بھوپتی اس سے قبل مہاسمدرم، منگلوارم اور آر ایس 100 جیسی فلمیں بنا چکے ہیں اور نوجوان موضوعات و گہری جذباتی کہانیوں کے باعث شہرت رکھتے ہیں۔

ڈائریکٹر نے اپنی سوشل میڈیا پوسٹ میں کہا کہ ایک منفرد کہانی کے ساتھ بڑی ذمہ داری بھی آئی ہے، اور انہیں یقین ہے کہ تلگو فلم انڈسٹری خوبصورت اور باصلاحیت راشا تھاڈانی کا گرمجوشی سے استقبال کرے گی۔

جیا کرشنا، مہیش بابو کے بڑے بھائی رمیش بابو کے صاحبزادے ہیں، جبکہ راشا تھاڈانی کچھ عرصہ قبل ہندی فلم “آزاد” کے ساتھ اپنے فلمی کیریئر کا آغاز کر چکی ہیں۔