31 مئی کو طلوع ہونے والا بلیو مائیکرو مون کیاتھا؟

اسلام آباد: فلکیات کے دلدادہ افراد کے لیے ایک انتہائی سحر انگیز اور نایاب خبر سامنے آئی ہے۔ گزشتہ رات (31 مئی 2026) آسمان پر طلوع ہونے والا چاند بنیادی طور پر ایک ’بلیو مائیکرو مون‘ تھا، جو کوئی عام مکمل چاند نہیں بلکہ دہائیوں بعد نظر آنے والا ایک منفرد فلکیاتی مظہر ہے۔

یہ چاند اس لیے غیر معمولی ہے کیونکہ یہ رواں ماہ مئی کے دوران سامنے آنے والا دوسرا مکمل چاند (Full Moon) تھا، اس سے قبل یکم مئی کو بھی مکمل چاند دیکھا گیا تھا۔ عام طور پر چاند کا ایک چکر ساڑھے 29 دن کا ہوتا ہے، جس کا مطلب ہے کہ ایک مہینے میں صرف ایک ہی بار مکمل چاند نظر آتا ہے۔ تاہم، جب کبھی کسی ایک ہی انگریزی مہینے میں دو مکمل چاند نظر آئیں، تو دوسرے چاند کو فلکیاتی اصطلاح میں ’بلیو مون‘ (Blue Moon) کہا جاتا ہے۔ یاد رہے کہ بلیو مون کا مطلب ہرگز یہ نہیں ہوتا کہ چاند کا رنگ نیلا ہو جائے گا، بلکہ یہ صرف ایک روایتی نام ہے۔

فلکیاتی ماہرین کے مطابق، بلیو مون کی ایک اور قسم ‘سیزنل بلیو مون’ بھی ہوتی ہے۔ یہ اصطلاح اس وقت استعمال کی جاتی ہے جب کسی ایک فلکیاتی سیزن (3 ماہ) کے دوران 3 کے بجائے 4 مکمل چاند نظر آئیں، تو چوتھے چاند کو سیزنل بلیو مون کہا جاتا ہے۔

دوسری طرف، زمین کے گرد چاند کا مدار مکمل طور پر گول نہیں ہے، اس لیے چاند کا زمین سے فاصلہ تبدیل ہوتا رہتا ہے:

• سپر مون (Super Moon): جب چاند اپنے مدار میں گھومتے ہوئے زمین کے سب سے زیادہ قریب ہوتا ہے اور مکمل دکھائی دے، تو اسے سپر مون کہتے ہیں۔

• مائیکرو مون (Micro Moon): جب مکمل چاند زمین سے اپنے طویل ترین (سب سے زیادہ) فاصلے پر موجود ہو، تو اسے مائیکرو مون کہا جاتا ہے۔

اگرچہ نام سے ایسا محسوس ہوتا ہے کہ مائیکرو مون بہت ہی چھوٹا ہوگا، لیکن حقیقت میں یہ معمول کے چاند سے محض 6 فیصد جبکہ سپر مون کے مقابلے میں 14 فیصد چھوٹا نظر آتا ہے۔

ماہرینِ فلکیات کا کہنا ہے کہ عام طور پر ایک مہینے میں دو بار چاند کا مکمل ہونا (بلیو مون) ہر 2 سال میں ایک بار دیکھنے کو مل جاتا ہے، جبکہ مائیکرو مون بھی ہر سال 2 سے 3 بار نظر آ ہی جاتے ہیں۔ لیکن ایک ہی وقت میں چاند کا ‘بلیو مون’ بھی ہونا اور اپنے دور ترین نقطہ پر ہونے کی وجہ سے ‘مائیکرو مون’ بھی بننا، یعنی ’بلیو مائیکرو مون‘ کا امتزاج دہائیوں بعد ہی ممکن ہوتا ہے۔ اب اس نایاب نظارے کو دوبارہ دیکھنے کے لیے انسانوں کو کئی برس تک طویل انتظار کرنا پڑے گا۔