آج آسمان پر 6 سیارے ایک ساتھ قطار میں نظر آئیں گے

12 اگست کی صبح اور رات کو فلکیاتی شائقین کے لیے ایک ساتھ متعدد نایاب اور دلکش مناظر دیکھنے کا سنہری موقع ملے گا۔ فلکیاتی ماہرین کے مطابق اس روز طلوعِ آفتاب سے قبل مشتری، عطارد، مریخ، زحل، یورینس اور نیپچون ایک ہی سمت میں قطار کی صورت میں دکھائی دیں گے۔ ماہرین نے وضاحت کی ہے کہ یہ سیارے خلا میں حقیقتاً ایک سیدھی لائن میں موجود نہیں ہوں گے، بلکہ زمین سے مشاہدے کے دوران ان کا مشرقی افق سے جنوب مغربی آسمان تک ایک قوس (Arc) کی شکل میں دکھائی دینا ’پلینٹری پریڈ‘ کہلاتا ہے۔

اس فلکیاتی منظر کے دوران مریخ اور زحل کو عام آنکھ سے آسانی سے دیکھا جا سکے گا، جبکہ افق کے قریب ہونے کے باعث عطارد اور مشتری کا مشاہدہ کچھ مشکل ہوگا۔ یورینس اور نیپچون کو دیکھنے کے لیے دوربین یا بائنوکیولر کی ضرورت پڑے گی۔ اس کے علاوہ 12 اگست کی رات ‘پرسیڈ میٹیور شاور’ (Perseid Meteor Shower) یعنی شہابِ ثاقب کی بارش بھی اپنے عروج پر ہوگی۔ نئے چاند کی وجہ سے آسمان نسبتاً تاریک رہے گا، جس سے شہابیوں کا گرنا اور بھی واضح اور سحر انگیز نظر آئے گا۔