دھرندھر کا اسکرپٹ چوری شدہ نکلا، معروف فلمسساز نے بڑا دعویٰ کردیا

بھارتی فلم انڈسٹری کی حالیہ ہٹ فلم ’دھُرندھر‘ ایک نئے تنازعے کا شکار ہو گئی ہے جہاں فلمساز سنتوش کمار آر ایس نے فلم کی کہانی پر سرقہ کا الزام عائد کر دیا ہے۔

میڈیا رپورٹس کے مطابق ایکشن تھرلر فلم ’دھُرندھر‘، جس میں رنویر سنگھ مرکزی کردار ادا کر رہے ہیں، باکس آفس پر کامیابی کے باوجود اب قانونی تنازع کی جانب بڑھ رہی ہے۔

سنتوش کمار کا دعویٰ ہے کہ یہ فلم ان کی 2023 میں لکھی گئی اسکرپٹ ’ڈی صاحب‘ پر مبنی ہے۔ ان کے مطابق فلم دیکھنے کے بعد انہیں اندازہ ہوا کہ اس کی کہانی ان کے آئیڈیا سے ملتی جلتی ہے۔

انہوں نے بتایا کہ ان کی کہانی ایک ایسے نوجوان کے گرد گھومتی ہے جس کے خاندان پر حملہ ہوتا ہے، وہ بدلہ لیتے ہوئے متعدد افراد کو قتل کرتا ہے اور بعد ازاں اسے جاسوس کے طور پر بھرتی کر لیا جاتا ہے۔ سنتوش کے مطابق یہی مرکزی خیال فلم ’دھُرندھر‘ میں استعمال کیا گیا ہے۔

انہوں نے مزید الزام لگایا کہ ہدایتکار آدیتیہ دھر نے ان کی کہانی کے بنیادی نکات لے کر اس میں سیاسی عناصر شامل کر دیے۔

سنتوش کمار کے مطابق انہوں نے اپنی اسکرپٹ مختلف بڑے پروڈکشن ہاؤسز جیسے سونی پکچرز، زی اسٹوڈیوز، ٹی-سیریز اور دھرمہ پروڈکشنز کو بھی پیش کی تھی۔

دوسری جانب فلم کے ہدایتکار آدیتیہ دھر اور ان کی ٹیم نے ان الزامات کو سختی سے مسترد کرتے ہوئے کہا ہے کہ فلم کی کہانی مکمل طور پر اصل ہے اور اسے ستمبر 2023 میں رجسٹر بھی کروا لیا گیا تھا۔

بھارتی میڈیا کے مطابق فلم کی ٹیم نے سنتوش کمار کے دعوؤں کو بے بنیاد اور ناقابل قبول قرار دیا ہے، جبکہ یہ معاملہ اب ممکنہ طور پر عدالت تک جا سکتا ہے۔