رانا ثنااللہ نے وزیراعظم کی تبدیلی بارے خبریں بے بنیاد قرار دے دیں

اسلام آباد: وزیراعظم کے سیاسی مشیر رانا ثناء اللہ نے بجٹ کے بعد ملک میں وزیراعظم کی تبدیلی سے متعلق گردش کرنے والی تمام خبروں کو مکمل طور پر بے بنیاد اور من گھڑت قرار دے کر مسترد کر دیا ہے۔ پارلیمنٹ ہاؤس میں صحافیوں سے گفتگو کرتے ہوئے انہوں نے واضح کیا کہ بعض مخصوص لوگ اس نوعیت کی افواہیں پھیلا کر ملک کے اندر سیاسی اور معاشی عدم استحکام پیدا کرنا چاہتے ہیں، حالانکہ حقیقت میں ایسا کوئی معاملہ زیرِ غور نہیں ہے۔

رانا ثناء اللہ نے کہا کہ وزیراعظم اس وقت بہترین حکمتِ عملی کے ساتھ ملک کو آگے لے کر جا رہے ہیں اور ان کی قیادت میں عالمی سطح پر پاکستان کو ایک بار پھر عزت اور وقار کا مقام حاصل ہوا ہے۔ انہوں نے زور دیا کہ ایسے مثبت موقع پر اس قسم کی منفی بحث چھیڑنا صرف ملک دشمن عناصر کا ہی کام ہو سکتا ہے۔ سیاسی ماحول پر بات کرتے ہوئے ان کا کہنا تھا کہ موجودہ حکومت نے ہمیشہ اپوزیشن کے ساتھ مذاکرات اور مفاہمت کی کوشش کی ہے، جبکہ اس کے برعکس جب وہ خود اپوزیشن میں تھے تو ان کے خلاف انتقامی کارروائیوں کے تحت مقدمات قائم کیے جا رہے تھے۔