رمشا خان اور خوشحال خان نے شادی کا باضابطہ اعلان کر دیا

پاکستان شوبز انڈسٹری کی معروف جوڑی رمشا خان اور خوشحال خان نے تمام تر افواہوں کو حقیقت کا روپ دیتے ہوئے آخر کار اپنی شادی کا باضابطہ اعلان کر دیا ہے۔ دونوں اداکاروں نے انسٹاگرام پر ایک مشترکہ پوسٹ کے ذریعے اپنے مداحوں کو اس بڑی خوشخبری سے آگاہ کیا۔

شادی کی تصاویر میں دیکھا جا سکتا ہے کہ رمشا خان نے روایتی سرخ رنگ کا خوبصورت عروسی جوڑا زیب تن کیا، جبکہ خوشحال خان سیاہ رنگ کی شلوار قمیض میں نظر آئے۔ اپنی پوسٹ میں انہوں نے لکھا، “بسم اللہ الرحمن الرحیم، ہم خوشی سے یہ خبر شیئر کر رہے ہیں کہ الحمدللہ ہم شادی کے بندھن میں بندھ گئے ہیں۔” انہوں نے اپنے مداحوں اور چاہنے والوں کا شکریہ ادا کرتے ہوئے کہا کہ وہ اس نئے سفر کے آغاز پر بے حد شکر گزار ہیں، تاہم انہوں نے مداحوں سے اپنی نجی زندگی کی پرائیویسی کا احترام کرنے کی بھی درخواست کی۔

یاد رہے کہ گزشتہ کچھ دنوں سے سوشل میڈیا پر ان کی شادی کی افواہیں گردش کر رہی تھیں اور نکاح کی چند تصاویر بھی وائرل ہوئی تھیں، جس پر رمشا خان نے ناراضگی کا اظہار کرتے ہوئے پرائیویسی کے تحفظ پر زور دیا تھا۔ اب باضابطہ اعلان کے بعد شوبز شخصیات اور مداحوں کی جانب سے اس نئی جوڑی کو مبارکباد دینے کا سلسلہ جاری ہے۔