راکول پریت نے انکم ٹیکس کارروائی سے تعلق کی تردید کردی

بالی ووڈ اداکارہ راکول پریت سنگھ نے انکم ٹیکس ڈیپارٹمنٹ کی جانب سے ممبئی میں کی جانے والی تلاشی کی کارروائیوں سے اپنا نام جوڑے جانے والی میڈیا رپورٹس کو سختی سے مسترد کر دیا ہے۔ سوشل میڈیا پر جاری اپنے بیان میں انہوں نے واضح کیا کہ یہ کارروائی ان کے خلاف نہیں تھی اور ان کے بارے میں خبریں حقائق کی تصدیق کے بغیر سنسنی خیز انداز میں پیش کی گئیں۔ اداکارہ نے غیر قانونی غیر ملکی ترسیلاتِ زر، بینامی جائیدادوں اور قیمتی تحائف سے اپنے یا کسی پروڈکشن ہاؤس کے تعلق کی تردید کرتے ہوئے کہا کہ وہ 20 سال کی عمر سے باقاعدگی سے ٹیکس ادا کر رہی ہیں۔ انہوں نے میڈیا اداروں سے مطالبہ کیا کہ وہ قیاس آرائیوں پر مبنی تمام جھوٹی رپورٹس واپس لیں اور صحافتی اصولوں کا خیال رکھیں۔