راکھی ساونت کی عمرہ ادائیگی کے بعد لوگوں میں جائے نماز تقسیم کرنے کی ویڈیو وائرل

مکہ مکرمہ: بھارتی شوبز انڈسٹری کی معروف اداکارہ راکھی ساونت نے ایک بار پھر عمرے کی سعادت حاصل کر لی ہے اور اس مقدس سفر کی ویڈیوز سوشل میڈیا پر اپنے مداحوں کے ساتھ شیئر کی ہیں۔

سوشل میڈیا پر وائرل ہونے والی ویڈیوز میں دیکھا جا سکتا ہے کہ راکھی ساونت نے عمرے کی ادائیگی کے بعد مکہ مکرمہ میں مقامی بازار سے 100 سے زائد جائے نمازیں خرید کر لوگوں میں تقسیم کیں۔ ویڈیو میں بات کرتے ہوئے انہوں نے بتایا کہ وہ اس وقت حرم شریف کے قریب موجود ہیں اور انہوں نے نیپال میں حالیہ سیلاب سے ہونے والی تباہی اور متاثرین کے لیے بھی اللہ تعالیٰ کے حضور خصوصی دعا کی ہے۔

راکھی ساونت کی جانب سے یہ مناظر سامنے آنے کے بعد ان کے مداحوں اور سوشل میڈیا صارفین نے انہیں مبارکباد دی اور ان کے اس نیک عمل کو سراہا۔ واضح رہے کہ راکھی ساونت اس سے قبل بھی عمرے کی سعادت حاصل کر چکی ہیں۔