سپر سٹار رجنی کانت نے خاکروب خاتون کو سونے کی چین گفٹ کردی

چنئی: بھارت کے معروف اداکار رجنی کانت نے ایک صفائی کرنے والی خاتون پدما کی غیر معمولی ایمانداری کو سراہتے ہوئے اسے سونے کی چین بطور تحفہ پیش کی، جس پر سوشل میڈیا پر بھی خوب چرچا ہو رہا ہے۔

بھارتی میڈیا کے مطابق یہ واقعہ گزشتہ ماہ چنئی میں ایک مندر کے قریب پیش آیا، جہاں سڑک کی صفائی کے دوران پدما کو زیورات سے بھرا ایک بیگ ملا۔ پدما نے وہ بیگ اپنے پاس رکھنے کے بجائے فوراً پولیس کے حوالے کر دیا، جس کے بعد پولیس نے تحقیقات کے ذریعے زیورات کے اصل مالک کو واپس کر دیا۔

ریاست تامل ناڈو کے وزیر اعلیٰ نے بھی پدما کی ایمانداری کو سراہتے ہوئے اسے ایک لاکھ بھارتی روپے نقد انعام دیا۔

ساؤتھ انڈین فلم انڈسٹری کے سپر اسٹار رجنی کانت نے پدما کو اپنی رہائش گاہ پر مدعو کیا اور اس کی ایمانداری کے اعتراف میں اسے سونے کی چین پیش کی۔ اداکار کی ٹیم نے ملاقات کی تصاویر سوشل میڈیا پر شیئر کیں، جنہیں مداحوں نے بھرپور سراہا۔

صارفین کا کہنا ہے کہ ایسے واقعات معاشرے میں ایمانداری اور انسانیت کا مثبت پیغام دیتے ہیں اور عوام کے لیے حوصلہ افزا مثال قائم کرتے ہیں۔