ربیع الثانی کا چاند کب نظر آئے گا؟ سپارکو نے پیشگوئی کردی

کراچی: قومی خلائی تحقیقاتی ادارے (سپارکو) نے ربیع الثانی 1448 ہجری کے چاند کی پیدائش اور اس کے نظر آنے کے حوالے سے جدید فلکیاتی پیشگوئی جاری کر دی ہے۔

ترجمان سپارکو کے مطابق ربیع الثانی 1448 ہجری کے چاند کی پیدائش 11 ستمبر کو صبح 8 بج کر 27 منٹ پر ہونے کی توقع ہے۔ فلکیاتی حساب کتاب کے مطابق 12 ستمبر کی شام ربیع الثانی کا نیا ہلال نظر آنے کے قوی امکانات موجود ہیں۔

سپارکو کی رپورٹ میں بتایا گیا ہے کہ 12 ستمبر کو ساحلی علاقوں میں چاند عام آنکھ کی مدد سے باآسانی دیکھا جا سکے گا، جبکہ دیگر میدانی و بالائی علاقوں میں ہلال کو دیکھنے کے لیے دوربین کا استعمال کرنا پڑے گا۔ ان فلکیاتی تخمینوں کے تحت پاکستان میں یکم ربیع الثانی 1448 ہجری 13 ستمبر کو ہونے کا امکان ہے۔

ترجمان سپارکو نے واضح کیا کہ یہ تمام اعداد و شمار سائنسی اور فلکیاتی تکنیکوں پر مبنی ہیں، جبکہ ملک بھر میں نئے اسلامی مہینے کے باقاعدہ آغاز کا حتمی اعلان مرکزی رویتِ ہلال کمیٹی کے باضابطہ اجلاس کے بعد ہی کیا جائے گا۔