رابی پیرزادہ نے اپنی ذاتی زندگی سے متعلق اہم انکشاف کر دیا

گلوکارہ اور کاروباری خاتون رابی پیرزادہ نے حال ہی میں اپنی ذاتی زندگی سے متعلق ایک اہم انکشاف کرتے ہوئے پہلی بار اپنی شادی اور خلع کے بارے میں کھل کر بات کی ہے۔

شوبز انڈسٹری میں شہرت حاصل کرنے کے بعد کنارہ کشی اختیار کرنے والی رابی پیرزادہ اس وقت ایک بیوٹی برانڈ چلا رہی ہیں، مصوری سے وابستہ ہیں اور فلاحی سرگرمیوں میں بھی سرگرم عمل ہیں۔

رابی پیرزادہ نے ایک پوڈکاسٹ میں شرکت کے دوران انکشاف کیا کہ وہ شادی شدہ تھیں، تاہم بعد ازاں انہوں نے خلع لینے کا فیصلہ کیا۔ ان کا کہنا تھا کہ وہ یہ بات پہلی مرتبہ عوام کے سامنے لا رہی ہیں اور اس سے قبل کبھی اپنی شادی یا علیحدگی کے حوالے سے گفتگو نہیں کی۔

انہوں نے کہا کہ وہ کسی کے خلاف بات نہیں کرنا چاہتیں، تاہم اس رشتے میں پیش آنے والے حالات کے بعد خلع لینا ان کے لیے ناگزیر ہو گیا۔ ان کے مطابق یہ فیصلہ شاید دونوں فریقین کی تکالیف کے خاتمے کا سبب بنا۔

رابی پیرزادہ نے مستقبل میں دوبارہ شادی کے امکان کا عندیہ دیتے ہوئے کہا کہ اس حوالے سے وہ اداکار احمد علی بٹ کی دی گئی نصیحت کو بھی یاد رکھتی ہیں۔

ایک اور اہم پہلو پر بات کرتے ہوئے رابی پیرزادہ نے بتایا کہ انہوں نے والدین کے دباؤ میں آ کر شادی کی تھی، جو کہ ’وٹہ سٹہ‘ یعنی تبادلہ شادی تھی، اور آج انہیں اس فیصلے پر افسوس ہے۔ ان کا کہنا تھا کہ اس طرح کی شادیوں میں اکثر فریقین کو شدید مشکلات کا سامنا کرنا پڑتا ہے۔